کرم میں پاک–افغان سرحد پر دراندازی ناکام، 25 سے زائد شدت پسند ہلاک

پاراچنار (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع کرم میں پاکستانی سیکیورٹی فورسز نے افغانستان سے دراندازی کی کوشش ناکام بناتے ہوئے 25 سے زائد شدت پسندوں کو ہلاک کر دیا۔

منگل کو سیکیورٹی ذرائع نے ڈیلی اردو کو بتایا کہ پاک–افغان سرحد پر واقع تورغر پوسٹ کے قریب 40 سے 45 شدت پسندوں نے پاکستانی حدود میں داخل ہونے کی کوشش کی، تاہم علاقے میں تعینات فورسز نے بروقت نقل و حرکت کا پتہ لگا کر فوری اور مؤثر کارروائی کی۔

ذرائع کے مطابق شدید فائرنگ کے تبادلے کے دوران 25 سے زائد شدت پسند موقع پر ہلاک ہوئے، جبکہ 20 سے 25 دیگر زخمی حالت میں سرحد پار فرار ہونے پر مجبور ہو گئے۔ ہلاک ہونے والے شدت پسندوں کی لاشیں سیکیورٹی فورسز نے اپنی تحویل میں لے لیں۔

ذرائع نے ڈیلی اردو کو بتایا کہ اس کارروائی کے دوران بڑی مقدار میں اسلحہ، گولہ بارود اور بارودی مواد بھی برآمد کیا گیا۔

سیکیورٹی حکام کا کہنا ہے کہ بروقت کارروائی اور اہلکاروں کی سخت چوکسی کے باعث علاقے میں ممکنہ بڑے حملے کو ناکام بنا دیا گیا۔ کسی بھی ممکنہ خطرے کے خاتمے کے لیے علاقے میں کلیئرنس آپریشن جاری ہے۔

ذرائع کے مطابق ہلاک ہونے والے شدت پسندوں کا تعلق تحریک طالبان پاکستان (ٹی ٹی پی) یا اس سے منسلک گروہوں سے تھا۔ سیکیورٹی فورسز نے سرحد پر سخت نگرانی برقرار رکھنے اور دراندازی کی کسی بھی کوشش کا فیصلہ کن جواب دینے کے عزم کا اعادہ کیا ہے۔

افغان طالبان کے 2021 میں اقتدار میں آنے کے بعد پاکستان کی مغربی سرحدی پٹی پر تشدد میں نمایاں اضافہ ہوا ہے۔ 2024 گزشتہ دہائی کا سب سے خونریز سال ثابت ہوا، جبکہ 2025 میں اب تک 400 سے زائد افراد، جن میں اکثریت سیکیورٹی اہلکاروں کی ہے، شدت پسند حملوں میں ہلاک ہو چکے ہیں۔

دوسری جانب پاکستانی فوج بلوچستان میں بھی علیحدگی پسند گروہوں کے خلاف کارروائیاں جاری رکھے ہوئے ہے۔ سیکیورٹی صورتحال کے پیش نظر حکومت نے جون میں دفاعی بجٹ میں 20 فیصد اضافہ کیا، جس کے تحت مجموعی وفاقی بجٹ کا 14 فیصد فوج کے لیے مختص کیا گیا۔