کرک میں پولیس موبائل پر حملہ، 5 اہلکار ہلاک، جوابی کارروائی میں 8 شدت ہسند مارے گئے

کرک/پشاور (نمائندگان ڈیلی اردو) پاکستان کے شورش زدہ صوبہ خیبر پختونخوا کے ضلع کرک کے علاقے گرگری میں پولیس کی موبائل وین پر شدت پسندوں کے حملے میں پانچ پولیس اہلکار ہلاک ہو گئے، جبکہ سرکاری گاڑی کو شدید نقصان پہنچا۔

پولیس کے مطابق ہلاک ہونے والوں میں ہیڈ کانسٹیبل شاہد زمان، کانسٹیبل عارف، کانسٹیبل سمیع اللہ، کانسٹیبل صفدر اور کانسٹیبل محمد شامل ہیں۔

واقعے کی اطلاع ملتے ہی ڈسٹرکٹ پولیس اور کاؤنٹر ٹیررازم ڈیپارٹمنٹ (سی ٹی ڈی) کے سینئر افسران بھاری نفری کے ہمراہ جائے وقوعہ پر پہنچ گئے۔ اس کے بعد پولیس اور سی ٹی ڈی کے اہلکاروں نے مشترکہ طور پر حملہ آوروں کا تعاقب کرتے ہوئے ان کے ٹھکانوں پر سرچ اینڈ اسٹرائیک آپریشن شروع کیا۔

پولیس کے مطابق آپریشن کے دوران سکیورٹی فورسز اور شدت پسندوں کے درمیان شدید فائرنگ کا تبادلہ ہوا، جس کے نتیجے میں آٹھ شدت پسند ہلاک ہو گئے۔ ہلاک ہونے والوں میں ایک انتہائی مطلوب شدت پسند عارف عرف ڈان بھی شامل ہے، جو علاقے میں دہشت گردی کی متعدد کارروائیوں میں ملوث تھا۔

پولیس کا کہنا ہے کہ شدت پسندوں کے سہولت کاروں کے خلاف بھی کارروائی تیز کر دی گئی ہے، جبکہ علاقے میں سرچ آپریشن تاحال جاری ہے۔

پولیس کے ترجمان کے مطابق واقعے کے بعد ڈی پی او سمیت پولیس کی بھاری نفری موقع پر موجود ہے اور حملے میں ملوث عناصر کا تعاقب جاری ہے۔

واضح رہے کہ گرگری کے علاقے میں قدرتی گیس کے وسیع ذخائر موجود ہیں، جہاں سے ملک کے مختلف حصوں کو گیس فراہم کی جاتی ہے۔ رپورٹس کے مطابق گزشتہ کچھ عرصے سے کرک اور اس کے مضافاتی علاقوں میں شدت پسندوں کی سرگرمیوں میں اضافہ دیکھا جا رہا ہے۔

دوسری جانب وزیرِ اعظم شہباز شریف اور وزیرِ اعلیٰ خیبر پختونخوا سہیل آفریدی نے پولیس موبائل پر حملے کی شدید مذمت کرتے ہوئے اسے افسوسناک قرار دیا ہے۔ 

وزیرِ اعلیٰ کا کہنا ہے کہ حملے میں ملوث عناصر کو قانون کے کٹہرے میں لا کر کیفرِ کردار تک پہنچایا جائے گا، جبکہ امن و امان کا قیام صوبائی حکومت کی اولین ترجیح ہے اور حکومت پولیس کے ساتھ کھڑی ہے۔