کوئٹہ میں فائرنگ سے شیعہ ہزارہ تاجر ہلاک، داعش نے ذمہ داری قبول کرلی

واشنگٹن (ش ح ط) پاکستان کے شورش زدہ صوبے بلوچستان کے دارالحکومت کوئٹہ کے علاقے ہزار گنجی میں نامعلوم مسلح افراد کی فائرنگ سے ایک شیعہ ہزارہ تاجر ہلاک ہو گیا، جبکہ شدت پسند تنظیم داعش پاکستان (ISPP) نے حملے کی ذمہ داری قبول کر لی ہے۔

پولیس کے مطابق ہزار گنجی کے رہائشی جان علی ولد جمعہ خان گزشتہ روز مارکیٹ جا رہے تھے کہ نامعلوم موٹرسائیکل سواروں نے ان پر فائرنگ کر دی اور موقع سے فرار ہو گئے۔ فائرنگ کے نتیجے میں جان علی موقع پر ہی ہلاک ہو گئے۔

اطلاع ملنے پر پولیس موقع پر پہنچی اور لاش کو ہسپتال منتقل کیا گیا، جہاں ضروری کارروائی کے بعد لاش ورثا کے حوالے کر دی گئی۔

مرکزی تنظیم تاجران بلوچستان کے ترجمان کاشف حیدری نے واقعے پر گہرے رنج و غم اور تشویش کا اظہار کرتے ہوئے کہا کہ شہر میں اس طرح کے واقعات قابل افسوس ہیں اور اس سے شہریوں میں عدم تحفظ کا احساس بڑھ رہا ہے۔

انہوں نے اپنے بیان میں کہا کہ نہتے شہریوں کو نشانہ بنانا کسی صورت برداشت نہیں کیا جا سکتا اور عوام کی جان و مال کا تحفظ یقینی بنانا پولیس اور قانون نافذ کرنے والے اداروں کی بنیادی ذمہ داری ہے۔

دوسری جانب شدت پسند تنظیم اسلامک اسٹیٹ آف پاکستان نے ایک بیان میں کوئٹہ کے نواحی علاقے ہزار گنجی میں ہونے والے اس حملے کی ذمہ داری قبول کرنے کا دعویٰ کیا ہے۔