کور کمانڈر حملہ کیس: کالعدم جند اللہ کے 9 دہشت گردوں کی سزائے موت برقرار، 2 بری

کراچی (ڈیلی اردو) سندھ ہائی کورٹ نے کور کمانڈر کراچی حملہ کیس میں 9 دہشت گردوں کی سزا کے خلاف اپیلیں مسترد کردیں۔

کور کمانڈر کراچی احسن سلیم حیات پر حملے سے متعلق کیس کی سندھ ہائی کورٹ میں سماعت ہوئی۔

عدالت نے کیس کا فیصلہ سناتے ہوئے 9 دہشت گردوں کی سزا کے خلاف اپیلیں مسترد کردیں اور سزائے موت کو برقرار رکھا۔

عدالت نے 2 دہشت گردوں کو بری کردیا جن میں یعقوب سعید خان اور نجیب اللہ شامل ہیں، جنہیں عدم ثبوت کی بناء پر بری کیا گیا۔

کالعدم تنظیم جند اللہ کے سرغنہ عطاءالرحمان، شہزاد باجوہ، دانش امام، خریم سیف، عزیز احمد، شہزاد مختار، راؤ خالد، شعیب احمد اور محمد خالد کی سزائیں برقرار رکھی گئی ہیں۔

انسداد دہشت گردی کی عدالت نے 11 ملزمان کو سزائے موت سنائی تھی، دہشت گردوں نے 2004 میں کور کمانڈر کراچی احسن سلیم حیات پر حملہ کیا تھا، حملے میں 6 جوان شہید ہوئے تھے جبکہ کور کمانڈر کراچی محفوظ رہے تھے۔