کیچ: مسلح دہشت گردوں نے ایک مزدور کو ہلاک، چھ کو اغوا کر لیا

کوئٹہ (ڈیلی اردو) پاکستان کے شورش زدہ صوبہ بلوچستان کے ضلع کیچ کے ہیڈکوارٹر تربت کے علاقے کلاتک میں نامعلوم مسلح دہشت گردوں نے سات غیر مقامی مزدوروں کو اغوا کر لیا۔ بعد ازاں اغوا کیے گئے مزدوروں میں سے ایک کو فائرنگ کرکے ہلاک کر دیا گیا، جبکہ دیگر چھ افراد کو اپنے ساتھ نامعلوم مقام پر لے گئے۔

پولیس حکام کے مطابق واقعہ اس وقت پیش آیا جب نامعلوم مسلح افراد نے کلاتک کے مقام پر ناکہ بندی کر رکھی تھی۔ مسلح افراد نے وہاں سے گزرنے والے غیر مقامی مزدوروں کو روک کر اپنے قبضے میں لے لیا۔

حکام کا کہنا ہے کہ اغوا کیے جانے والے تمام افراد غیر مقامی مزدور تھے، تاہم ان کی شناخت اور تعلق کے بارے میں مزید معلومات اکٹھی کی جا رہی ہیں۔

محکمہ داخلہ حکومت بلوچستان کے معاون برائے میڈیا بابر یوسفزئی نے واقعے کی تصدیق کرتے ہوئے بتایا کہ اغوا کے بعد مسلح افراد نے ایک مزدور کو فائرنگ کرکے ہلاک کر دیا، جبکہ باقی چھ افراد کو اپنے ساتھ نامعلوم مقام پر لے گئے۔

انہوں نے واقعے کی شدید مذمت کرتے ہوئے کہا کہ یہ کارروائی ریاست دشمن عناصر کی جانب سے کی گئی، جن کا مقصد بلوچستان میں امن و امان کی صورتحال کو خراب کرنا ہے۔ ان کے بقول حکومت اور سکیورٹی ادارے ایسے عناصر کے خلاف کارروائیاں جاری رکھے ہوئے ہیں۔

واقعے کے بعد سکیورٹی فورسز اور قانون نافذ کرنے والے اداروں نے علاقے میں سرچ آپریشن شروع کر دیا ہے۔ حکام کا کہنا ہے کہ اغوا کیے گئے مزدوروں کی بازیابی اور حملہ آوروں کی گرفتاری کے لیے مختلف مقامات پر کارروائیاں کی جا رہی ہیں۔

پولیس کے مطابق واقعے کی مختلف پہلوؤں سے تحقیقات جاری ہیں، جبکہ ہلاک ہونے والے مزدور کی لاش قانونی کارروائی کے بعد ورثا کے حوالے کرنے کی تیاری کی جا رہی ہے۔