گلگت بلتستان میں فوجی گاڑی کے قریب دھماکا، ایک اہلکار ہلاک، میجر سمیت 4 زخمی

واشنگٹن (ش ح ط) پاکستان کے زیرِ انتظام خطے گلگت بلتستان کے ضلع دیامر، تحصیل تانگیر کے علاقے بوشیداس میں عسکریت پسندوں نے فرنٹیئر ورکس آرگنائزیشن (ایف ڈبلیو او) کی گاڑی کو دیسی ساختہ بم (آئی ای ڈی) سے نشانہ بنایا، جس کے نتیجے میں گاڑی کا ڈرائیور ہلاک جبکہ پاکستان آرمی کے ایک میجر سمیت چار اہلکار زخمی ہوگئے۔

پولیس اور سیکیورٹی ذرائع کے مطابق واقعہ اس وقت پیش آیا جب ایف ڈبلیو او کے اہلکار تانگیر ہائیڈرو پاور پراجیکٹ کے دورے کے بعد واپس گلگت جا رہے تھے۔ معمول کی گشت کے دوران سڑک کنارے نصب آئی ای ڈی دھماکے سے پھٹ گیا، جس سے گاڑی کو شدید نقصان پہنچا۔

زخمی اہلکاروں کو فوری طور پر قریبی طبی مرکز منتقل کر دیا گیا ہے، جہاں انہیں طبی امداد دی جا رہی ہے۔

حملے کے بعد سیکیورٹی فورسز نے فوری جوابی کارروائی کرتے ہوئے دو عسکریت پسندوں کو ہلاک کر دیا، جبکہ علاقے میں جاری سرچ آپریشن کے دوران چار مشتبہ افراد کو حراست میں لے لیا گیا ہے۔

حکام کے مطابق علاقے میں کلیئرنس آپریشن جاری ہے اور واقعے کی تحقیقات شروع کر دی گئی ہیں۔