گوادر میں دہشت گردوں کا کوسٹ گارڈز چیک پوسٹ پر حملہ، دو اہلکار ہلاک

کوئٹہ (ڈیلی اردو) پاکستان کے شورش زدہ صوبے بلوچستان کے ساحلی ضلع گوادر کے علاقے جیونی میں دہشت گردوں کے حملے میں کوسٹ گارڈز کے دو اہلکار ہلاک جبکہ ایک زخمی ہوگیا۔

سرکاری حکام نے واقعے کی تصدیق کرتے ہوئے بتایا کہ یہ حملہ ضلع کے علاقے پانوان میں پیش آیا، جہاں دہشت گردوں نے کوسٹ گارڈز کی ایک چیک پوسٹ کو نشانہ بنایا۔

رابطہ کرنے پر ایس ایس پی گوادر عطاالرحمان ترین نے بتایا کہ حملے میں کوسٹ گارڈز کے دو اہلکار ہلاک اور ایک زخمی ہوگیا۔ ہلاک ہونے والوں کی شناخت نائیک سلیم اور سپاہی عدنان جبکہ زخمی اہلکار کی شناخت سپاہی عظیم کے نام سے ہوئی ہے۔

انہوں نے بتایا کہ زخمی اہلکار کو طبی امداد کے لیے ہسپتال منتقل کر دیا گیا ہے۔ جائے وقوعہ سے شواہد اکٹھے کر کے تحقیقات کا آغاز کر دیا گیا ہے جبکہ علاقے کو گھیرے میں لے کر سرچ آپریشن جاری ہے۔

یاد رہے کہ جیونی بلوچستان کے ساحلی ضلع گوادر کی تحصیل ہے اور یہ علاقہ ایرانی سرحد سے گوادر شہر کی جانب تقریباً 25 سے 30 کلومیٹر کے فاصلے پر واقع ہے۔

دوسری جانب گوادر سے متصل ضلع کیچ کے ہیڈکوارٹر تربت شہر میں اتوار کی شب دھماکوں کی آوازیں سنائی دیں۔ تربت پولیس کے اہلکار عبدالغنی بلوچ کے مطابق ان دھماکوں سے کسی جانی یا مالی نقصان کی اطلاع نہیں ملی۔