ہنگو میں دہشت گردوں کا حملہ، ڈی ایس پی سمیت 10 پولیس اہلکار ہلاک، 18 زخمی

پشاور/ہنگو (ڈیلی اردو رپورٹ) پاکستان کے شورش زدہ صوبہ خیبر پختونخوا کے ضلع ہنگو میں دہشت گردوں نے خزانہ بانڈہ پولیس چیک پوسٹ پر حملہ کر دیا، جس کے نتیجے میں ڈی ایس پی سمیت 10 پولیس اہلکار ہلاک جبکہ 18 اہلکار زخمی ہو گئے۔ پولیس کی جوابی کارروائی میں 6 دہشت گرد بھی مارے گئے۔

کالعدم تحریک طالبان پاکستان (ٹی ٹی پی) نے اس حملے کی ذمہ داری قبول کر لی ہے۔

ضلع پولیس افسر (ڈی پی او) طارق حبیب کے مطابق دہشت گردوں نے بدھ کی شب خزانہ بانڈہ چیک پوسٹ کو نشانہ بنایا، جس کے بعد پولیس اور حملہ آوروں کے درمیان شدید فائرنگ کا تبادلہ ہوا۔

انہوں نے بتایا کہ آپریشن کے دوران ڈی ایس پی دیار خان شدید زخمی ہوئے، جنہیں فوری طور پر ڈسٹرکٹ ہیڈکوارٹرز (ڈی ایچ کیو) ہسپتال منتقل کیا گیا، تاہم وہ زخموں کی تاب نہ لاتے ہوئے ہلاک ہو گئے۔ حملے میں مزید 7 پولیس اہلکار بھی ہلاک ہوئے، جس کے بعد مجموعی تعداد 8 ہو گئی۔

ڈی پی او کے مطابق زخمی اہلکاروں میں ڈی ایس پی مجاہد حسین سمیت 18 پولیس اہلکار شامل ہیں، جنہیں مختلف ہسپتالوں میں منتقل کر دیا گیا ہے۔ حکام کے مطابق بعض زخمیوں کی حالت تشویشناک ہے، جس کے باعث ہلاکتوں میں اضافے کا خدشہ ظاہر کیا جا رہا ہے۔

پولیس کے مطابق جوابی کارروائی میں 6 دہشت گرد مارے گئے، جبکہ علاقے میں سرچ اور کلیئرنس آپریشن جاری ہے۔

دریں اثنا وزیراعلیٰ خیبر پختونخوا محمد سہیل آفریدی نے حملے کا نوٹس لیتے ہوئے آئی جی پولیس سے رپورٹ طلب کر لی۔ انہوں نے ہلاک ہونے والے پولیس اہلکاروں کو خراج عقیدت پیش کرتے ہوئے ان کے اہل خانہ سے اظہار تعزیت کیا اور زخمی اہلکاروں کو بہترین طبی سہولیات فراہم کرنے کی ہدایت کی۔

وزیراعلیٰ نے کہا کہ خیبر پختونخوا پولیس نے دہشت گردی کے خلاف جنگ میں بے مثال قربانیاں دی ہیں اور امن کا قیام حکومت کی اولین ترجیح ہے۔

دوسری جانب گورنر خیبر پختونخوا فیصل کریم کنڈی نے بھی حملے کی مذمت کرتے ہوئے ہلاک اہلکاروں کے اہل خانہ سے ہمدردی کا اظہار کیا۔

حکام کے مطابق حملے کی تحقیقات جاری ہیں جبکہ علاقے میں سیکیورٹی مزید سخت کر دی گئی ہے۔