یمن حوثی باغیوں کا اسرائیلی ہوائی اڈے کے قریب میزائل حملہ، 6 افراد زخمی

تل ابیب (ڈیلی اردو) اسرائیلی حکام کے مطابق، اتوار کی صبح یمن سے فائر کیا گیا ایک میزائل تل ابیب کے بین گورین ایئرپورٹ کے مرکزی ٹرمینل کے قریب آ کر گرا، جس کے نتیجے میں کم از کم چھ افراد زخمی ہو گئے۔

غیر تصدیق شدہ ویڈیوز میں دکھایا گیا ہے کہ ایئرپورٹ کے قریب علاقے میں دھوئیں کے بادل بلند ہو رہے ہیں۔ اسرائیلی میڈیا کے مطابق، چار افراد دھماکے سے زخمی ہوئے، جبکہ مزید دو افراد پناہ گاہ کی جانب جاتے ہوئے زخمی ہوئے۔

اسرائیلی وزیر دفاع یوآف گالانت نے شدید ردعمل دیتے ہوئے کہا ہے کہ “جو کوئی ہمیں مارے گا، ہم اسے سات گنا زیادہ زور سے ماریں گے۔”

حوثی باغیوں کے ترجمان یحییٰ سری نے ایک بیان میں دعویٰ کیا کہ اسرائیل کا بین الاقوامی ہوائی اڈہ اب فضائی سفر کے لیے محفوظ نہیں رہا۔

اسرائیلی فوج نے اعتراف کیا ہے کہ میزائل کو مار گرانے میں ناکامی ہوئی، اور اس کی وجوہات کی تحقیقات جاری ہیں۔ سینیئر پولیس افسران نے صحافیوں کو میزائل گرنے کی جگہ پر ایک گڑھا دکھایا جو ایئرپورٹ کے ٹرمینل تھری کی پارکنگ لاٹ کے قریب واقع ایک سڑک پر بنا ہے۔ حکام کے مطابق میزائل سے کوئی بڑا نقصان نہیں ہوا۔

ایئرپورٹ کو عارضی تعطل کے بعد دوبارہ کھول دیا گیا ہے، تاہم واقعے کے بعد پورے ملک میں سائرن بج اٹھے۔

اسرائیلی وزیر اعظم بنیامین نیتن یاہو نے اتوار کے روز وزراء اور دفاعی حکام سے ملاقات کا اعلان کیا ہے تاکہ حملے کے ممکنہ جوابی اقدامات پر غور کیا جا سکے۔

واضح رہے کہ ایران کے حمایت یافتہ حوثی گروپ نے گزشتہ کئی ماہ سے اسرائیل پر حماس کے ساتھ یکجہتی کے اظہار میں میزائل حملے جاری رکھے ہوئے ہیں، جنہیں عموماً اسرائیل کا فضائی دفاعی نظام ناکام بناتا رہا ہے۔ اس گروپ نے بحیرہ احمر میں بحری جہازوں پر بھی حملے کیے، جن کے ردعمل میں امریکہ اور برطانیہ کی جانب سے فضائی کارروائیاں کی گئی ہیں۔