یوکرین پر بڑے فضائی حملے، 3 افراد ہلاک، درجنوں زخمی، زیلینسکی

کیئو + ماسکو (ڈیلی اردو/ بی بی سی) یوکرین کے صدر ولادیمیر زیلینسکی نے کہا ہے کہ روس کی جانب سے رات گئے کیے گئے بڑے فضائی حملوں میں کم از کم تین افراد ہلاک اور 30 سے زائد زخمی ہوئے ہیں۔

زیلینسکی کے مطابق روسی حملے منظم حکمت عملی کے تحت کیے گئے جن میں بنیادی ڈھانچے کو نشانہ بنانے کے ساتھ ساتھ شہریوں میں خوف و ہراس پھیلانے کی غرض سے ایک رہائشی عمارت پر براہ راست میزائل داغا گیا۔

یوکرین کی فضائیہ نے دعویٰ کیا ہے کہ روس نے مجموعی طور پر 619 ڈرون اور میزائل فائر کیے۔

دوسری جانب روس کی وزارت دفاع کا کہنا ہے کہ اس کے بڑے پیمانے پر کیے گئے حملے میں فوجی صنعتی تنصیبات کو "بھرپور اور درست" طریقے سے نشانہ بنایا گیا۔ 

ماسکو نے یہ بھی دعویٰ کیا ہے کہ یوکرینی ڈرون حملے میں ساراتوف کے علاقے میں چار افراد ہلاک ہوئے جبکہ ایک بڑی آئل ریفائنری کو نقصان پہنچا۔ یوکرین کا کہنا ہے کہ اس نے ساراتوف اور سمارا کے علاقوں میں روسی تیل کی تنصیبات کو نشانہ بنایا۔

بی بی سی کے مطابق دونوں ممالک کے ان دعوؤں کی آزادانہ طور پر تصدیق نہیں ہو سکی۔

خیال رہے کہ سرحد پار سے ڈرون حملے اس جنگ کی نمایاں خصوصیت بن چکے ہیں۔ رواں سال جولائی میں یوکرین کے ایک ڈرون حملے کے باعث روس کو اپنے تقریباً تمام ہوائی اڈوں کی پروازیں روکنی پڑی تھیں۔

ماہرین کے مطابق یوکرین منظم انداز میں روسی تیل اور صنعتی ڈھانچے کو نشانہ بنا رہا ہے جس نے اس جنگ میں کلیدی کردار ادا کیا ہے۔

یہ حملے ایسے وقت میں کیے گئے ہیں جب یوکرین اور اس کے مغربی اتحادیوں کی جانب سے جنگ بندی کا مطالبہ بڑھ رہا ہے۔ تاہم حالیہ ہفتوں میں روس نے یوکرین پر فضائی حملوں میں شدت پیدا کر دی ہے۔

اس ماہ کے آغاز میں کیئو میں مرکزی سرکاری عمارت پر بھی کروز میزائل حملہ کیا گیا تھا جس کی ذمہ داری یوکرین نے روس پر عائد کی۔

صدر زیلینسکی نے ہفتے کے روز اعلان کیا کہ وہ اگلے ہفتے نیویارک میں ہونے والی اقوام متحدہ کی جنرل اسمبلی کے اجلاس کے موقع پر امریکی صدر ڈونلڈ ٹرمپ سے ملاقات کریں گے۔

یاد رہے کہ روسی صدر ولادیمیر پوتن نے فروری 2022 میں یوکرین پر حملے کا آغاز کیا تھا جس کے بعد سے دونوں ممالک کے درمیان جنگ مسلسل جاری ہے۔