یوکرین کا روس پر اب تک کا سب سے بڑا ڈرون حملہ

کییف/ماسکو (ڈیلی اردو/نیوز ایجنسیاں) یوکرین نے جمعرات اور جمعے کی درمیانی شب روس، روس کے زیرِ قبضہ کریمیا اور گرد و نواح کے سمندری علاقوں پر بڑے پیمانے پر ڈرون حملے کیے، جنہیں گزشتہ چار برس سے جاری جنگ کے دوران یوکرین کے سب سے بڑے فضائی حملوں میں سے ایک قرار دیا جا رہا ہے۔

روسی وزارت دفاع کے مطابق ملکی فضائی دفاعی نظام نے روس کے ایک درجن علاقوں، کریمیا اور ملحقہ سمندری علاقوں میں 660 یوکرینی ڈرون مار گرائے۔ اس سے قبل رواں سال 17 مئی کو یوکرین نے 556 جنگی ڈرونز کے ذریعے بڑا حملہ کیا تھا۔

یوکرین طویل فاصلے تک مار کرنے والے ڈرونز کے ذریعے روس کے اندر تیل کی تنصیبات، توانائی کے مراکز اور فوجی اہداف کو مسلسل نشانہ بنا رہا ہے تاکہ جنگ میں روس پر دباؤ بڑھایا جا سکے۔

یوکرین کی سکیورٹی سروس (ایس بی یو) کے مطابق اس کے ڈرونز نے کریمیا کے اہم بندرگاہی شہر کیرچ میں روسی بحریہ کے جہازوں اور فضائی دفاعی ریڈاروں کو نشانہ بنایا۔

ایس بی یو کے مطابق ان حملوں میں روس کے دو جاسوسی کرنے اور بارودی سرنگیں بچھانے والے بحری جہازوں وولگا اور ویاتکا کے علاوہ مال بردار اور مسافر بردار فیری پیٹروپاولووسک کو بھی نشانہ بنایا گیا، جس سے ان پر بڑے پیمانے پر آگ بھڑک اٹھی۔ ان دعوؤں کی آزاد ذرائع سے تصدیق نہیں ہو سکی۔

یوکرینی صدر وولودیمیر زیلنسکی نے سوشل میڈیا پلیٹ فارم ایکس پر لکھا کہ انہوں نے روس کو جنگ ختم کرنے پر مجبور کرنے کے لیے 40 روزہ شدید ترین حملوں کا حکم دے دیا ہے۔

ماسکو کے میئر سیرگئی سوبیانن نے بتایا کہ روسی دارالحکومت کی طرف بڑھتے ہوئے یوکرین کے 47 ڈرونز مار گرائے گئے۔ انہوں نے کہا کہ ان حملوں میں کسی جانی نقصان یا املاک کو نقصان پہنچنے کی اطلاعات نہیں ملیں۔