یہودی برادری پر حملے، برطانوی وزیرِاعظم کا سخت کارروائی کا اعلان

لندن (ڈیلی اردو/بی بی سی) برطانوی وزیرِ اعظم کیئر سٹارمر نے کہا ہے کہ برطانیہ کی یہودی برادری کو ایک بار پھر “انتہائی قابلِ نفرت دہشت گردی کے حملے” کا سامنا کرنا پڑا، جب دو افراد پر چاقو سے حملہ کیا گیا۔ ان کا کہنا تھا کہ متاثرین کو صرف اس لیے نشانہ بنایا گیا کیونکہ وہ یہودی تھے۔

10 ڈاؤننگ اسٹریٹ میں میڈیا سے گفتگو کرتے ہوئے وزیرِ اعظم نے گولڈرز گرین کا دورہ کرنے کا ذکر کرتے ہوئے کہا کہ حکومت نے ایسے واقعات کے خلاف سخت اقدامات کا عزم کیا ہے۔ ان کے مطابق یہ کوئی الگ تھلگ واقعہ نہیں بلکہ یہود مخالف حملوں میں اضافہ ایک تشویشناک رجحان ہے۔

انہوں نے کہا کہ اس صورتحال کے باعث یہودی برادری کو خوف کی فضا میں زندگی گزارنی پڑ رہی ہے، جہاں لوگ اپنی شناخت ظاہر کرنے، عبادت گاہوں میں جانے، بچوں کو اسکول بھیجنے یا روزمرہ سرگرمیوں کے بارے میں بھی غیر یقینی کا شکار ہیں۔

وزیرِ اعظم نے اعلان کیا کہ حکومت پولیس کی موجودگی میں اضافہ کرے گی، سیکیورٹی پر زیادہ سرمایہ کاری کی جائے گی اور نفرت انگیز مواد پھیلانے والے اداروں کے خلاف سخت کارروائی کی جائے گی۔ انہوں نے کہا کہ عدالتی نظام کے ساتھ مل کر یہود مخالف جرائم کے مقدمات میں سزاؤں کے عمل کو تیز کیا جائے گا۔

انہوں نے مزید کہا کہ حکومت ایسے افراد کو ملک میں داخل ہونے سے روکنے کے لیے نئے قوانین متعارف کرائے گی جو نفرت پھیلانے میں ملوث ہوں، جبکہ انسدادِ دہشت گردی قوانین کو مزید سخت بنایا جائے گا۔

اس دوران یہ بھی سامنے آیا ہے کہ حملے میں ملوث 45 سالہ ملزم عیسیٰ سلیمان کو 2020 میں حکومت کے انسدادِ دہشت گردی پروگرام میں شامل کیا گیا تھا۔ تاہم وزیرِ اعظم نے واضح کیا کہ واقعے کی تحقیقات جاری ہیں اور ابھی مکمل حقائق سامنے نہیں آئے ہیں۔