22 فوجی آپریشنز کے باوجود دہشت گردی میں اضافہ، پالیسی بدلنے کا عندیہ، وزیراعلیٰ خیبرپختونخوا

لاہور (ڈیلی اردو رپورٹ) وزیراعلیٰ خیبرپختونخوا سہیل آفریدی نے کہا ہے کہ ملٹری آپریشنز کے باوجود صوبے میں دہشت گردی میں اضافہ ہو رہا ہے اور اس کے پیشِ نظر موجودہ پالیسی کو تبدیل کرنا ناگزیر ہے۔

یہ بات انہوں نے لاہور کے دورے کے تیسرے دن سینئر صحافیوں، اینکر پرسنز، ڈیجیٹل میڈیا نمائندوں، مختلف ٹی وی چینلز کے بیورو چیفس سے ملاقات کے دوران کہی۔

مریم نواز کو کھلا چیلنج

وزیراعلیٰ نے پاکستان مسلم لیگ (ن) کی رہنما مریم نواز کو خیبرپختونخوا میں جلسہ کرنے کی دعوت دی اور کھلا چیلنج دیتے ہوئے کہا کہ وہ صوبے میں آئیں اور عوام کے سامنے جمہوری اور مہذب انداز میں استقبال کا تجربہ کریں۔ 

سہیل آفریدی نے کہا کہ پنجاب حکومت کی جانب سے دعویٰ کیا جاتا ہے کہ عمران خان کی کال پر عوام باہر نہیں نکلتے، اس لیے وہ مریم نواز کو ایک ہفتے کی تیاری کے بعد صوبے میں جلسہ کرنے کی دعوت دیتے ہیں۔

وزیر اعلیٰ نے گزشتہ عام انتخابات کے حوالے سے کہا کہ پاکستان تحریک انصاف نے پنجاب سے 180 نشستیں جیتیں، جو عوام کے اعتماد کا واضح ثبوت ہیں۔ انہوں نے دعویٰ کیا کہ عوام آج بھی تحریک انصاف کی کال پر باہر نکلنے کے لیے تیار ہیں۔

دہشت گردی اور ملٹری آپریشنز

وزیراعلیٰ سہیل آفریدی نے کہا کہ صوبے میں اب تک تقریباً 22 بڑے فوجی آپریشنز اور 22 ہزار کے قریب انٹیلی جنس بیسڈ آپریشنز کیے جا چکے ہیں، لیکن ان کے باوجود دہشت گردی میں کمی نہیں آئی، بلکہ یہ بڑھ رہی ہے۔ 

انہوں نے کہا کہ اتنے آپریشنز، نقصانات اور جانوں کی قربانی کے باوجود مطلوبہ نتائج حاصل نہیں ہوئے، اس کا مطلب یہ ہے کہ پالیسی میں تبدیلی ضروری ہے۔

پنجاب میں جمہوری روایات کی خلاف ورزی

وزیر اعلیٰ نے کہا کہ پنجاب میں انتظامیہ کی سختیوں اور پابندیوں نے انہیں حیران کر دیا۔ انہوں نے بتایا کہ لاہور پہنچنے سے پہلے ہی سیکڑوں کارکنان کو گرفتار کر لیا گیا اور ان کے راستے میں رکاوٹیں کھڑی کی گئیں۔ انہوں نے کہا کہ یہ رویہ جمہوری روایات کے منافی اور ایک آمرانہ سوچ کی عکاسی کرتا ہے۔

دہشت گردی کے خاتمے کیلئیے متبادل راستہ

سہیل آفریدی نے دہشت گردی کے خاتمے کے لیے متبادل حکمت عملی بھی پیش کی، جس میں صوبائی حکومت، قبائلی مشران، علمائے کرام اور معاشرے کے دیگر اسٹیک ہولڈرز کو شامل کرنا ضروری قرار دیا۔ انہوں نے کہا کہ عوامی مشاورت سے بننے والی پالیسی نہ صرف قابل عمل ہوگی بلکہ اس کے پیچھے عوامی حمایت بھی موجود ہوگی، جبکہ بند کمروں میں کیے گئے فیصلے نقصان دہ ثابت ہوئے ہیں۔

انہوں نے صوبائی اسمبلی میں منعقد گرینڈ جرگے کا حوالہ دیتے ہوئے کہا کہ تمام سیاسی جماعتوں، علمائے کرام اور اسٹیک ہولڈرز نے متفقہ طور پر کہا کہ ملٹری آپریشن کسی مسئلے کا حل نہیں ہیں۔

اختتام اور فاتحہ خوانی

دورے کے اختتام پر وزیراعلیٰ سہیل آفریدی نے مزار اقبال پر حاضری دی اور فاتحہ خوانی کی۔ انہوں نے صحافیوں سے گفتگو کرتے ہوئے کہا کہ پنجاب انتظامیہ کی جانب سے مختلف مقامات پر غیر معمولی رکاوٹیں اور پابندیاں لگائی گئی ہیں، جن سے عوام اور کارکنان دونوں متاثر ہوئے ہیں۔