50 سال بعد اسرائیل نے اینتیبے آپریشن کے خفیہ راز بے نقاب کر دیے

یروشلم (ڈیلی اردو/نیوز ایجنسیاں) اسرائیل کے سرکاری آرکائیوز کے ادارے نے نے اینتیبے طیارہ اغوا کے واقعے کی 50 ویں برسی کے موقع پر تاریخی دستاویزات کا ایک مکمل مجموعہ جاری کر دیا ہے، جس کے بعد ملکی عوام اس وقت کی اسرائیلی حکومت کے اقدامات کی بہت سی تفصیلات جان سکتے ہیں۔

حکام نے آپریشن اینتیبے سے متعلق تمام فائلیں جاری کر دی ہیں، جن میں وہ دستاویزات بھی شامل ہیں جو پہلے خفیہ رکھی گئی تھیں۔

27 جون 1976 کو فلسطینی اور جرمن دہشت گردوں نے ایتھنز سے پیرس جانے والے ایئر فرانس کے ایک طیارے کو اغوا کر لیا تھا۔ ان کا مقصد اسرائیل، فرانس، جرمنی اور سوئٹزرلینڈ میں قید افراد کو رہا کروانا تھا، جن میں سابقہ مغربی جرمن ریاست کی بائیں بازو کی شدت پسند تنظیم ریڈ آرمی فیکشن (آر اے ایف) کے قیدی بھی شامل تھے۔

لیبیا میں مختصر قیام کے بعد اغواکار اس طیارے کو یوگنڈا کے شہر اینتیبے لے گئے تھے۔ تب دہشت گردوں نے زیادہ تر غیر یہودی مسافروں کو رہا کر دیا تھا، جبکہ 100 سے زائد یہودی اور اسرائیلی یرغمالیوں کو قبضے میں رکھا گیا تھا، جنہیں 4 جولائی 1976 کو ایک جرأت مندانہ اسرائیلی فوجی کارروائی کے دوران آزاد کرا لیا گیا تھا۔

اس کارروائی کے دوران تمام اغواکار مارے گئے تھے، جبکہ تین یرغمالی، یوگندا کے کئی فوجی اور ایک اسرائیلی کمانڈر یوناتان نیتن یاہو بھی ہلاک ہو گئے تھے، جو موجودہ اسرائیلی وزیر اعظم بینجمن نیتن یاہو کے بھائی تھے۔

اب جاری کر دی گئی دستاویزات میں اس بحران کے دوران اسرائیلی حکومت کی طرف سے کیے جانے والے غور و فکر، حکمت عملی سے متعلق خدشات اور کئی طرح کے ممکنہ حالات کا تفصیلی جائزہ شامل ہے۔