باجوڑ : عوامی نیشنل پارٹی کے رہنما مولانا خان زیب سمیت دو افراد ہلاک

باجوڑ کے علاقے خار میں شنڈئی موڑ کے قریب نامعلوم افراد کی فائرنگ سے عوامی نیشنل پارٹی کے مرکزی رہنما اور علما ونگ کے سیکرٹری مولانا خان زیب اپنے پولیس سیکیورٹی اہلکار شیر زادہ کے ہمراہ ہلاک ہو گئے، جبکہ گاڑی میں سوار دیگر تین افراد زخمی ہوئے۔

واقعہ تحصیل خار کے ہیڈکوارٹر سے چند قدم کے فاصلے پر اس وقت پیش آیا جب مولانا خان زیب امن مارچ کی تیاریوں کے سلسلے میں روانہ تھے۔ زخمی افراد کی شناخت ڈاکٹر طارق، شاہ سوار اور عثمان کے ناموں سے ہوئی ہے، جنہیں فوری طور پر قریبی اسپتال منتقل کر دیا گیا۔

سانحے کے بعد علاقے میں شدید کشیدگی پیدا ہو گئی۔ عوامی نیشنل پارٹی کے کارکنان اور عام شہریوں نے شدید غم و غصے کا اظہار کیا، اور مولانا خان زیب کا تابوت اٹھا کر خار بازار میں احتجاجی ریلی نکالی۔ مشتعل مظاہرین نے سیکیورٹی فورسز کے دفتر پر پتھراؤ کیا، جس کے جواب میں فورسز نے شیلنگ کر کے حالات پر قابو پانے کی کوشش کی۔

پارٹی رہنماؤں کا کہنا ہے کہ مولانا خان زیب 13 جولائی کو باجوڑ میں ہونے والے امن مارچ کی تیاریوں میں مصروف تھے، اور ان کا قتل علاقائی سیاسی و سماجی ماحول کو مزید خراب کر سکتا ہے۔

مولانا خان زیب کی نمازِ جنازہ 11 جولائی بروز جمعہ صبح 11 بجے ان کے آبائی علاقے ناوگئی میں ادا کی جائے گی۔

وزیر اعلیٰ خیبرپختونخوا علی امین گنڈاپور نے واقعے کی شدید مذمت کی ہے اور ذمہ داروں کو انصاف کے کٹہرے میں لانے کے عزم کا اظہار کیا ہے۔