بلوچستان : کوئٹہ میں مسافروں کو بسوں سے اتار کر شناخت کے بعد قتل کردیا گیا

بلوچستان کے پُرآشوب علاقے سر ڈھاکہ میں سفاک دہشتگردوں نے بسوں سے اتار کر نو مغوی مسافروں کو بے رحمی سے قتل کر دیا اور ان کی لاشیں پہاڑی علاقے میں پھینک کر فرار ہوگئے۔ واردات رات کی تاریکی میں انجام دی گئی، جب سیکیورٹی کی موجودگی نسبتاً کم ہوتی ہے۔

ہلاک ہونے والے تمام مسافر پنجاب کے مختلف علاقوں سے تعلق رکھتے تھے۔ ان کی میتیں ایمبولینسز کے ذریعے لورالائی منتقل کی گئیں، جہاں سے بعد ازاں انہیں آبائی علاقوں کی جانب روانہ کیا گیا۔ افسوسناک واقعے میں دنیا پور سے تعلق رکھنے والے دو سگے بھائی، عثمان طور اور جابر طور بھی شامل تھے، جو اپنے والد کے جنازے میں شرکت کے لیے سفر کر رہے تھے۔

بلوچستان حکومت کے ترجمان شاہد رند نے واقعے کی تصدیق کرتے ہوئے کہا کہ دہشتگردوں نے سر ڈھاکہ کے قریب بسوں کو روک کر نہتے مسافروں کو نشانہ بنایا۔ ان کے مطابق یہ بزدلانہ کارروائی دشمن کی درندگی اور فتنہ الہند کی واضح عکاسی ہے، جس کا بھرپور جواب ریاستی طاقت سے دیا جائے گا۔ سرچ آپریشن شروع کر دیا گیا ہے اور دہشتگردوں کی تلاش جاری ہے۔

کمشنر ڈیرہ غازی خان ڈویژن اشفاق احمد چوہدری نے بتایا کہ لورالائی میں دہشتگردی کا نشانہ بننے والے تمام ہلاک شدگان کی میتیں بواٹہ کے مقام سے سخت سیکیورٹی کے حصار میں ڈی جی خان روانہ کی گئیں۔ میتیں بارکھان کے سرکاری حکام سے وصول کی گئیں، جنہیں پولیٹیکل اسسٹنٹ ڈی جی خان اسد خان چانڈیہ نے وصول کیا۔ تمام میتوں کو ان کے آبائی علاقوں تک پہنچانے کے انتظامات مکمل کر لیے گئے ہیں۔