آبنائے ہرمز میں امریکی مداخلت پر فیصلہ کن اور فوری جواب دینگے، ایرانی فوج

تہران (ڈیلی اردو/نیوز ایجنسیاں) ایران کے خاتم الانبیاء مرکزی ہیڈ کوارٹر (ایرانی مسلح افواج) نے خبردار کیا ہے کہ آبنائے ہرمز میں ایران کی جانب سے مقرر کردہ بحری راستوں سے انحراف یا ایرانی نیویگیشن ضوابط کو نظر انداز کرنے والے جہازوں کی سلامتی خطرے میں پڑ سکتی ہے۔

خاتم الانبیاء ہیڈ کوارٹر کی جانب سے جاری بیان میں کہا گیا ہے کہ آبنائے ہرمز میں کسی بھی امریکی مداخلت کا ایرانی مسلح افواج کی طرف سے "فیصلہ کن اور فوری جواب" دیا جائے گا۔

بیان میں آبنائے ہرمز کو ایران کی خودمختاری سے متعلق ایک اہم آبی گزرگاہ قرار دیتے ہوئے آئل ٹینکروں، تجارتی جہازوں اور دیگر تمام بحری جہازوں پر زور دیا گیا کہ وہ محفوظ آمدورفت کے لیے ایران کی جانب سے مقرر کردہ بحری راستوں کی پابندی کریں۔

ایرانی فوج کے مطابق اگر کوئی جہاز ان راستوں سے انحراف کرتا ہے یا ایران کے نیویگیشن پروٹوکول کو نظر انداز کرتا ہے تو اسے مسلح افواج کی جانب سے "فوری اور سخت ردِعمل" کا سامنا کرنا پڑ سکتا ہے۔

بیان میں مزید کہا گیا کہ آبنائے ہرمز کے اوپر امریکی لڑاکا طیاروں اور ڈرونز کی مسلسل موجودگی اس اہم آبی گزرگاہ کی سلامتی اور خطے کے استحکام کے لیے خطرہ ہے۔

اس سے قبل ایران کے نائب وزیر خارجہ کاظم غریب آبادی نے سوشل میڈیا پلیٹ فارم ایکس پر دعویٰ کیا تھا کہ آبنائے ہرمز کی نگرانی امریکی سینٹکام نہیں بلکہ ایران کی کمان کے تحت ہوتی ہے۔

دوسری جانب جہاز رانی سے متعلق متعدد یونینوں اور کمپنیوں نے گزشتہ روز اعلان کیا کہ دو تجارتی بحری جہازوں پر حالیہ حملوں کے بعد، ایران اور امریکہ کے درمیان جنگ بندی کے باوجود، آبنائے ہرمز کو کم از کم آئندہ آٹھ روز کے لیے "جنگی آپریشنز زون" تصور کیا جائے گا۔

بیان کے مطابق یہ درجہ بندی کم از کم 9 جولائی تک برقرار رہے گی، جبکہ سیکیورٹی صورتحال کا ہفتہ وار جائزہ لیا جائے گا۔