آبنائے ہرمز میں کشیدگی برقرار، امریکہ کے ایران پر دوسرے روز بھی فضائی حملے

واشنگٹن (ڈیلی اردو) امریکہ نے آبنائے ہرمز میں ہفتے کے روز پاناما کے پرچم بردار ایک تجارتی جہاز پر مبینہ ڈرون حملے کے بعد ایران میں نئے فضائی حملے کیے ہیں۔

امریکی سینٹرل کمانڈ (سینٹکام) کے مطابق تجارتی جہاز رانی کے خلاف ایران کی "مسلسل جارحیت" کے جواب میں ملک بھر میں متعدد اہداف کو نشانہ بنایا گیا، جن میں فوجی سازوسامان، مواصلاتی نظام، فضائی دفاعی تنصیبات اور ڈرون ذخیرہ کرنے کے مراکز شامل ہیں۔

امریکی صدر ڈونلڈ ٹرمپ نے کہا کہ یہ حملے ایران کی جانب سے جنگ بندی معاہدے کی بار بار مبینہ خلاف ورزیوں کے ردِعمل میں کیے گئے ہیں۔

انہوں نے اپنے سوشل میڈیا پلیٹ فارم ٹروتھ سوشل پر لکھا کہ “ایک وقت ایسا بھی آ سکتا ہے جب ہمارے لیے مزید تحمل کا مظاہرہ کرنا ممکن نہ رہے۔”

ایران نے تاحال ان تازہ حملوں پر کوئی باضابطہ ردِعمل نہیں دیا ہے۔

سینٹکام نے اپنے بیان میں کہا کہ ایران کو جنگ بندی معاہدے پر عمل درآمد کا موقع دیا گیا تھا، لیکن اس نے ایسا نہیں کیا اور پاناما کے پرچم بردار آئل ٹینکر ایم ٹی کیکو پر ڈرون حملہ کیا۔

بیان میں مزید کہا گیا کہ آبنائے ہرمز میں تجارتی جہازوں کی آمدورفت معمول کے مطابق جاری ہے۔

تازہ حملوں کے اعلان کے بعد صدر ٹرمپ نے ایک اور بیان میں کہا کہ یہ "بہت ممکن" ہے کہ تہران “کبھی سبق نہیں سیکھے گا۔”

بعد ازاں ہفتے کی شام انہوں نے مزید لکھا: “ایک وقت ایسا بھی آ سکتا ہے جب ہمارے لیے مزید تحمل کا مظاہرہ کرنا ممکن نہ رہے اور ہمیں وہ کام عسکری طور پر مکمل کرنا پڑے جو ہم نے بہت کامیابی سے شروع کیا تھا۔”

انہوں نے خبردار کیا کہ “اگر ایسا ہوا تو اسلامی جمہوریہ ایران کا وجود باقی نہیں رہے گا۔”

امریکی حملوں کے چند گھنٹوں بعد کویت اور بحرین نے اپنے فضائی دفاعی نظام فعال کرنے کا اعلان کیا۔

کویتی مسلح افواج نے ایکس پر جاری بیان میں کہا کہ ملک کا فضائی دفاعی نظام دشمن کے میزائل اور ڈرون حملوں کا مقابلہ کر رہا ہے، جبکہ عوام سے سکیورٹی ہدایات پر عمل کرنے کی اپیل کی گئی۔

ادھر بحرین کی وزارتِ داخلہ نے شہریوں سے پرامن رہنے اور قریبی محفوظ مقامات پر منتقل ہونے کی ہدایت کی۔

یہ کارروائیاں ایسے وقت میں کی گئی ہیں جب امریکہ نے دو روز قبل بھی دعویٰ کیا تھا کہ اس نے 25 جون کو سنگاپور کے پرچم بردار کارگو جہاز ایم وی ایور لاولی پر مبینہ ڈرون حملے کے جواب میں ایران پر جوابی حملے کیے تھے۔

سینٹکام نے ان حملوں کو "طاقتور ردِعمل" قرار دیتے ہوئے کہا تھا کہ تجارتی جہاز رانی کے خلاف ایرانی کارروائیاں جنگ بندی معاہدے کی کھلی خلاف ورزی ہیں۔

دوسری جانب تہران کا مؤقف ہے کہ مذکورہ کارگو جہاز آبنائے ہرمز سے گزرنے کے لیے "غیر منظور شدہ راستہ" استعمال کر رہا تھا، جبکہ امریکی حملے خود جنگ بندی معاہدے کی خلاف ورزی ہیں۔

ایرانی وزارتِ خارجہ نے ہفتے کی صبح جاری بیان میں کہا کہ اس کے جواب میں امریکی مفادات سے منسلک اہداف کو نشانہ بنایا گیا ہے اور موجودہ کشیدگی کی ذمہ داری "معاہدہ توڑنے والی امریکی حکومت" پر عائد ہوتی ہے۔

واضح رہے کہ امریکہ اور ایران نے 17 جون کو 14 نکاتی مفاہمتی یادداشت کے تحت کشیدگی میں کمی پر اتفاق کیا تھا، جس میں ایران کی جانب سے 60 روز تک تجارتی جہازوں کی محفوظ اور بلا تعطل آمدورفت یقینی بنانے کا وعدہ بھی شامل تھا۔