آبنائے ہرمز پر امریکی مداخلت برداشت نہیں کرینگے، ایران

تہران (ڈیلی اردو) ایران نے امریکی صدر ڈونلڈ ٹرمپ کے اس بیان کو مسترد کر دیا ہے جس میں انہوں نے کہا تھا کہ امریکہ آبنائے ہرمز کا کنٹرول سنبھال رہا ہے۔ ایرانی عسکری حکام نے خبردار کیا ہے کہ تہران اس اہم بحری گزرگاہ کے انتظامی امور میں کسی بھی غیر ملکی مداخلت کی اجازت نہیں دے گا۔

ایرانی خبر رساں ادارے تسنیم کے مطابق ایران کے عسکری ہیڈکوارٹر خاتم الانبیا نے اپنے بیان میں کہا ہے کہ آبنائے ہرمز میں امریکی سرگرمیوں نے خطے کی سلامتی کو "شدید خطرات" سے دوچار کر دیہے۔

بیان میں کہا گیا کہ “ہم امریکہ کو اس اہم آبی گزرگاہ پر کنٹرول حاصل کرنے کی اجازت نہیں دیتے اور نہ ہی دیں گے۔”

ایرانی عسکری حکام نے کہا کہ ایرانی مسلح افواج امریکی اقدامات سے پیدا ہونے والی کسی بھی کشیدگی یا ممکنہ خلل سے نمٹنے کے لیے تیار ہیں۔

بیان میں خبردار کیا گیا کہ امریکہ کے ساتھ تعاون کرنے والے ممالک کے اقدامات کو ایران اپنی خودمختاری کے خلاف "جنگی اقدام" تصور کرے گا۔

ایرانی فوج نے مزید کہا کہ اگر موجودہ تنازع مزید پھیلتا ہے تو “جنگ کے شعلے خطے کے تمام ممالک کو اپنی لپیٹ میں لے سکتے ہیں۔”

ایرانی پارلیمانی عہدیدار کا ردعمل

امریکی صدر کی جانب سے ایرانی بندرگاہوں کے خلاف نئی بحری ناکہ بندی کے اعلان کے بعد ایران کی قومی سلامتی اور خارجہ پالیسی کمیشن کے رکن پارلیمنٹ ابراہیم رضائی نے بھی ردعمل دیا۔

سوشل میڈیا پلیٹ فارم ایکس پر جاری بیان میں انہوں نے کہا کہ “آبنائے ہرمز کے تحفظ کے لیے ہمیں غیر ملکیوں کی ضرورت نہیں۔”

انہوں نے امریکی اقدامات کو خطے میں بڑھتی ہوئی کشیدگی کا باعث قرار دیا۔

پاسداران انقلاب کا امریکہ کو انتباہ

دوسری جانب ایرانی پاسداران انقلاب کے ایک ترجمان نے کہا ہے کہ امریکہ کی جانب سے آبنائے ہرمز میں مداخلت نے عالمی تیل اور گیس کی فراہمی کو خطرے میں ڈال دیا ہے۔

تسنیم کے مطابق پاسداران انقلاب کے بیان میں کہا گیا کہ ایران اب بھی آبنائے ہرمز پر کنٹرول رکھتا ہے اور غیر ملکی طاقتوں اور ان کے اتحادیوں کو "ایرانی عوام کی مرضی کے سامنے جھکنے پر مجبور" کرے گا۔

بیان میں مزید دعویٰ کیا گیا کہ ایران امریکہ کی نئی کارروائیوں کے جواب میں اسے "مزید ذلت اور مایوسی" سے دوچار کرے گا۔

عالمی توانائی منڈیوں پر اثرات

یہ بیانات ایسے وقت میں سامنے آئے ہیں جب امریکہ اور ایران کے درمیان فوجی کشیدگی میں اضافہ ہو رہا ہے اور دونوں ممالک ایک دوسرے کے خلاف حملوں کے دعوے کر رہے ہیں۔

رپورٹس کے مطابق حالیہ کشیدگی کے بعد عالمی منڈیوں میں تیل کی قیمتوں میں اضافہ دیکھا گیا، تاہم قیمتیں اب بھی اس سطح سے کم ہیں جو تنازع کے عروج کے دوران ریکارڈ کی گئی تھیں۔

آبنائے ہرمز دنیا کی اہم ترین توانائی گزرگاہوں میں شمار ہوتی ہے جہاں سے عالمی تیل کی بڑی مقدار روزانہ منتقل ہوتی ہے۔ خطے میں کسی بھی قسم کی طویل بندش یا فوجی کشیدگی عالمی توانائی کی ترسیل اور بحری تجارت کو متاثر کر سکتی ہے۔