ابوظہبی مذاکرات: روس، یوکرین میں 314 جنگی قیدیوں کے تبادلے کا معاہدہ طے

ابوظہبی  (ڈیلی اردو) امریکی ایلچی اسٹیو وٹکوف نے اعلان کیا ہے کہ یوکرین اور روس نے کئی ماہ بعد پہلی بار 314 قیدیوں کے تبادلے پر اتفاق کر لیا ہے، تاہم انہوں نے کہا کہ ابھی بھی بہت سے ضروری کام باقی ہیں۔

یوکرینی ترجمان نے بتایا کہ یوکرین اور روس کے درمیان چار سال سے جاری جنگ کے خاتمے کے لیے ابو ظہبی میں ہونے والے دو روزہ مذاکرات اب ختم ہو چکے ہیں۔

یوکرین کے اہم  مذاکرات کار رستم عمروف کی ترجمان ڈیانا ڈیوٹین نے صحافیوں کو بتایا کہ ابو ظہبی میں امریکہ کی ثالثی میں ہونے والے مذاکرات آج کے لیے ختم ہو گئے ہیں، تاہم انہوں نے نتائج یا مزید تفصیلات فراہم نہیں کیں۔

امریکی خصوصی ایلچی اسٹیو وٹکوف نے کہا کہ روس اور یوکرین نے 314 قیدیوں کے تبادلے پر اتفاق کیا ہے۔

وٹکوف نے اپنے ایکس اکاؤنٹ پر لکھا، ’’یہ نتیجہ تفصیلی اور نتیجہ خیز امن مذاکرات کے ذریعے حاصل ہوا ہے۔‘‘ انہوں نے مزید کہا کہ دونوں ممالک کے درمیان جنگ کے خاتمے کے لیے ابھی بھی نمایاں کوششیں درکار ہیں، جو دوسری عالمی جنگ کے بعد یورپ کا سب سے خونریز تنازعہ ہے۔

انہوں نے مزید کہا، ’’ایسے اقدامات ظاہر کرتے ہیں کہ مسلسل سفارتی رابطے ٹھوس نتائج دے رہے ہیں اور یوکرین میں جنگ کے خاتمے کی کوششوں کو آگے بڑھا رہے ہیں۔‘‘

قبل ازیں روسی صدر ولادیمیر پوٹن کے ایلچی کیریل دمترییف نے آج بات چیت شروع ہونے سے قبل سرکاری میڈیا کو بتایا تھا کہ ’’چیزیں اچھی اور مثبت سمت میں آگے بڑھ رہی ہیں۔‘‘ اس کے ساتھ ہی انہوں نے یورپ اور برطانیہ پر ’’اس عمل میں مداخلت کی کوشش کرنے کا‘‘ کا الزام بھی عائد کیا۔