اسرائیل: ایرانی بیلسٹک میزائل کا ملبہ آئل ریفائنری اور ٹینکر پر گرا

تل ابیب (ڈیلی اردو/روئٹرز) اسرائیل کی فائر اینڈ ریسکیو سروس نے پیر کے روز بتایا کہ ممکنہ طور پر ایران کی طرف سے فائر کردہ لیکن فضا میں ہی تباہ کر دیے گئے ایک بیلسٹک میزائل کا ملبہ شمالی اسرائیلی شہر حیفا میں اسرائیلی آئل ریفائنریز میں کھڑے ایک آئل ٹینکر اور ایک عمارت پر جا گرا۔

یروشلم سے 30 مارچ کو موصولہ نیوز ایجنسی روئٹرز کی رپورٹوں کے مطابق ملکی فائر اینڈ ریسکیو سروس نے بتایا کہ اس میزائل کو اسرائیل کے فضائی دفاعی نظام نے فضا میں ہی تباہ کر دیا تھا، تاہم اس کا ملبہ حیفا شہر میں ملکی آئل ریفائنریز کی ایک صنعتی عمارت اور وہاں کھڑے ایک آئل ٹینکر پر جا گرا۔

بتایا گیا ہے کہ اس واقعے میں کوئی جانی نقصان نہیں ہوا۔ تاہم یہ بات یقین سے نہیں کہی جا سکتی کہ آیا یہ میزائل ایران نے فائر کیا تھا یا لبنان میں ایران نواز شیعہ ملیشیا حزب اللہ نے اس کے ذریعے اسرائیلی صنعتی تنصیبات کو ہدف بنانے کی کوشش کی تھی۔

اس میزائل کا ملبہ گرنے کے نتیجے میں ریفائنریز کی گراؤنڈ پر کھڑے ایک آئل ٹینکر اور قریبی صنعتی عمارت کی چھت سے دھوئیں کے گہرے بادل آسمان کی طرف اٹھتے دکھائی دیے۔

ریسکیو سروس نے بتایا کہ اس آگ پر قابوپانے اور اسے پھیلنے سے روکنے کی کوششیں جاری تھیں اور ساتھ ہی ان افراد کی تلاش بھی جو ممکنہ طور پر اس عمارت کے اندر پھنسے ہوئے ہو سکتے تھے۔

اسی دوران اسرائیلی وزیر توانائی ایلی کوہن نے کہا ہے کہ اس میزائل کاملبہ گرنے سے ریفائنریز کی پیداواری صلاحیت کو کوئی نقصان نہیں پہنچا اور وہاں سے تیل کی سپلائی معمول کے مطابق جاری رہے گی۔