اسرائیل: حوثی باغیوں کا ڈرون ایلات کے رامون ایئرپورٹ پر گرا، پروازیں معطل

تل ابیب (ڈیلی اردو/اے ایف پی) اسرائیل کی ایئرپورٹس اتھارٹی نے اتوار کو بتایا ہے کہ یمن کے حوثی باغیوں سے داغا گیا ایک ڈرون بحیرہ احمر کے قریب واقع شہر ایلات کے رامون ایئرپورٹ پر گرا۔ اتھارٹی نے کہا کہ ایئرپورٹ پر پروازوں کی آمد و رفت معطل کر دی گئی ہے اور معمول کے آپریشنز جلد بحال کرنے کی کوشش کی جا رہی ہے۔

اسرائیلی فوج نے کہا کہ واقعے کی تحقیقات جاری ہیں لیکن اس کے اثرات کے بارے میں مزید تفصیلات فراہم نہیں کی گئیں۔ یہ بھی واضح نہیں کہ آیا ڈرون کو فضا میں تباہ کیا گیا یا نہیں۔

ایلات کے قریب واقع یہ ایئرپورٹ، جو اردن اور مصر کی سرحد کے قریب ہے، زیادہ تر ملکی پروازوں کے لیے استعمال ہوتا ہے۔

اس سے چند گھنٹے قبل اسرائیلی فوج نے بتایا تھا کہ اس نے یمن سے داغے گئے تین ڈرونز کو روک لیا ہے۔ بیان کے مطابق دو ڈرونز کو اسرائیلی فضائی حدود میں داخل ہونے سے پہلے ہی تباہ کر دیا گیا جبکہ تیسرے کے بارے میں کوئی تفصیل نہیں دی گئی۔

چند روز قبل حوثی باغیوں نے گزشتہ ماہ اسرائیلی فضائی حملے میں اپنے وزیراعظم کے قتل کا بدلہ لینے کا عزم ظاہر کیا تھا۔