اسرائیل میں فائرنگ، ایک ہلاک، 5 زخمی، حملہ آور مارا گیا

یروشلم (ڈیلی اردو/روئٹرز) مغربی کنارے کے مقبوضہ فلسطینی علاقے کے قریب وسطی اسرائیل میں اتوار سات جون کے روز مشتبہ دہشت گردانہ شوٹنگ کے ایک واقعے میں ایک شخص ہلاک اور پانچ دیگر زخمی ہو گئے۔ اسرائیلی ایمبولینس سروس کے مطابق اس واقعے میں مشتبہ حملہ آور بھی پولیس کی فائرنگ میں مارا گیا۔

یروشلم سے موصولہ رپورٹوں کے مطابق پولیس نے بھی تصدیق کر دی ہے کہ اس حملے کا مشتبہ ملزم مارا گیا ہے۔ پولیس نے تاہم فوری طور پر ہلاک ہونے والے شوٹر کی شناخت ظاہر نہیں کی۔

پولیس کی طرف سے کوئی دیگر تفصیلات بتائے بغیر صرف اتنا کہا گیا، ’’پولیس کی بھاری نفری موقع پر موجود ہے اور ریسکیو ورکرز اپنی کارروائیوں میں مصروف ہیں۔‘‘

ریسکیو کارکنوں کے مطابق اس حملے میں ایک 35 سالہ شخص گولیاں لگنے سے شدید زخمی ہو گیا تھا، جو کچھ ہی دیر بعد دم توڑ دیا۔ اس شوٹنگ میں پانچ دیگر افراد بھی زخمی ہوئے، جن میں سے دو کی حالت تشویشناک بتائی گئی ہے۔

اسرائیلی ایمبولینس سروس نے بتایا کہ وسطی اسرائیل کے قصبے کوخاو یائر میں یہ شوٹنگ دراصل تین مختلف مقامات پر کی گئی، اور یہ مقامات مقبوضہ مغربی کنارے کے فلسطینی علاقے کے شہر قلقیلیہ سے محض چند کلومیٹر دور ہیں۔

نیوز ایجنسی روئٹرز نے لکھا ہے کہ فلسطینی عسکریت پسند تنظیم حماس نے اسرائیل میں شوٹنگ کے اس واقعے کو سراہا ہے، لیکن اس حملے کی ذمے داری قبول نہیں کی۔

جرمن خبر رساں ادارے ڈی پی اے نے بتایا ہے کہ اسرائیلی وزیر اعظم بینجمن نیتن یاہو کے دفتر کی طرف سے کہا گیا کہ اس واقعے کے بعد وزیر اعظم کو فوراﹰ اس حملے سے متعلق بریفنگ دی گئی۔

اسرائیلی نیوز ویب سائٹ ’وائی نیٹ‘ کے مطابق مارا جانے والے حملہ آور مشتبہ طور پر اسرائیل کا ایک عرب شہری تھا۔