اسرائیل نے جنگ کی تیاری شروع کر دی

یروشلم (ڈیلی اردو/این این آئی) اسرائیلی فوج نے بڑے پیمانے پر فوج کی تینوں مسلح افواج پر مشتمل جنگی مشقیں شروع کردیں۔

عالمی میڈیا رپورٹس کے مطابق یہ پیش رفت ایک ایسے وقت میں سامنے آئی ہے جب حال ہی میں امریکی صدر ڈونلڈ ٹرمپ نے مشرق وسطیٰ کے لیے ایک نیا منصوبہ پیش کیا ہے جسے فلسطینیوں کی طرف سے مسترد کردیا گیا ہے۔

فلسطینیوں کی طرف سے امریکی منصوبے کو تسلیم کرنے سے انکار اور عرب ممالک اور عالم کی طرف سے مخالفت کے بعد خطے میں کشیدگی میں اضافہ ہوگیا ہے۔

اسرائیلی فوج کی طرف سے جاری کردہ ایک بیان میں کہا گیا کہ مسلح افواج نے ایک سے زائد محاذوں پر جنگ کے تناظر میں فوج کو تیار رکھنے کی کوشش کی جا رہی ہے۔

اسی مقصد کے لیے بری فوج، نیوی اور فضائیہ پر مشتمل یونٹوں کی جنگی مشقیں شروع کی گئی ہیں۔

ادھر اسرائیلی فوج کے ترجمان نے ایک بیان میں کہا کہ ان مشقوں کا مقصد فوج کو لبنان سے متصل شمالی محاذ اور جنوب میں غزہ کے محاذ پر کسی بھی جنگ کے لیے تیار کرنا ہے۔