اسرائیل نے یمن حوثیوں کے کروز میزائل اور ڈرون حملے ناکام بنا دیے

صنعاء/تل ابیب (ڈیلی اردو/نیوز ایجنسیاں)  اسرائیلی حکام نے کہا ہے کہ یمن کے حوثی جنگجوؤں کی جانب سے داغے گئے کروز میزائل اور ڈرون حملے کو فضا میں ہی ناکام بنا دیا گیا۔

حوثی جنگجوؤں نے دعویٰ کیا ہے کہ ہفتے اور اتوار کی درمیانی شب جنوبی اسرائیل کے مختلف علاقوں کو نشانہ بناتے ہوئے دوسرا حملہ کیا گیا۔

حوثی ترجمان یحییٰ سریع کے مطابق یہ حملے کروز میزائلوں اور ڈرونز کے ذریعے کیے گئے، جن کا ہدف اسرائیل کی متعدد اہم فوجی تنصیبات تھیں۔

انھوں نے کہا کہ یہ کارروائیاں ایران اور حزب اللہ کی متعلقہ فوجی سرگرمیوں کے ساتھ مل کر کی گئیں اور اپنے مقاصد میں کامیاب رہیں۔ ترجمان نے خبردار کیا کہ آئندہ چند دنوں میں مزید حملے کیے جائیں گے، جب تک دشمن اپنی حملوں اور جارحیت بند نہیں کرتا۔

یہ بیان ان کے ٹیلی گرام اکاؤنٹ پر اس وقت جاری کیا گیا جب اسرائیلی اور امریکی میڈیا میں حوثیوں کے تازہ حملوں کی خبریں سامنے آئیں۔

رپورٹس کے مطابق ایران کے حمایت یافتہ اس گروہ نے اسرائیل کی جانب ایک کروز میزائل بھی داغا، جسے اسرائیلی دفاعی نظام نے فضا میں ہی تباہ کر دیا۔ اس سے چند گھنٹے قبل ایک بیلسٹک میزائل اسرائیلی فضائی حدود میں داخل ہونے کی اطلاع بھی دی گئی تھی۔

اسرائیلی میڈیا، بشمول چینل 12 اور ٹائمز آف اسرائیل، نے جنوبی اسرائیلی شہر ایلات پر ڈرون حملے کی اطلاع دی، جس کے بارے میں کہا گیا کہ یہ یمن کی جانب سے اسرائیل کی فضائی حدود میں داخل ہوا تھا۔

اس سے قبل حوثیوں نے کہا تھا کہ انہوں نے ایران، لبنان، عراق اور فلسطینی علاقوں پر اسرائیل کے حملوں کے ردعمل میں اہم اسرائیلی فوجی تنصیبات کو نشانہ بنایا ہے۔

دوسری جانب اسرائیلی حکام کا کہنا ہے کہ یمن سے آنے والے ایک میزائل کو فضا میں ہی تباہ کر دیا گیا اور کسی شہری یا فوجی تنصیبات کو نقصان نہیں پہنچا۔