اسرائیل کا ایرانی جوہری مرکز نطنز پر حملہ، تابکاری خارج نہیں ہوئی: آئی اے ای اے

نیو یارک (ڈیلی اردو)اقوام متحدہ کے جوہری نگران ادارے، انٹرنیشنل اٹامک انرجی ایجنسی (IAEA)، نے تصدیق کی ہے کہ ایران کے نطنز جوہری مرکز پر حالیہ حملے کے بعد کسی قسم کی تابکاری خارج نہیں ہوئی۔

ادارے کے مطابق ایران نے نطنز تنصیب پر حملے کی اطلاع دی اور ایرانی ایٹمی توانائی تنظیم کی رپورٹ کی توثیق کی کہ کوئی تابکاری خارج نہیں ہوئی۔ 

آئی اے ای اے نے مزید کہا کہ وہ اس واقعے کی تحقیقات جاری رکھے ہوئے ہے اور اس کے سربراہ رافائل گروسی نے فریقین سے تحمل کا مظاہرہ کرنے کی اپیل کی ہے تاکہ کسی جوہری حادثے سے بچا جا سکے۔

ایرانی خبر رساں ادارے تسنیم کے مطابق، امریکہ اور اسرائیل نے ہفتے کے روز وسطی ایران میں واقع نطنز کی جوہری تنصیب کو نشانہ بنایا، جو یورینیم افزودگی کے لیے استعمال ہوتی ہے۔ 

ایرانی ایٹمی توانائی تنظیم نے بیان میں کہا، "امریکہ اور  صہیونی ریاست کے مجرمانہ حملوں میں نطنز افزودگی کمپلیکس کو نشانہ بنایا گیا"۔

بیان کے مطابق اس حملے کے نتیجے میں کسی قسم کے تابکار مواد کا اخراج نہیں ہوا اور قریبی آبادی کو کوئی خطرہ لاحق نہیں۔ امریکہ اور دیگر مغربی ممالک کو خدشہ ہے کہ ایران یورینیم کو اس سطح تک افزودہ کر رہا ہے جو جوہری ہتھیار بنانے کے لیے موزوں ہو سکتی ہے، تاہم تہران ہمیشہ اس کی تردید کرتا رہا ہے۔ 

یاد رہے کہ جنگ کے ابتدائی ہفتے میں بھی نطنز تنصیب کو نشانہ بنایا گیا تھا اور سیٹلائٹ تصاویر میں متعدد عمارتوں کو نقصان پہنچنے کے شواہد سامنے آئے تھے۔