اسرائیل کی لبنان میں عسکری کارروائیوں میں شدت

یروشلم (ڈیلی اردو) اسرائیلی فوج نے ہفتے کے روز جنوبی لبنان کے ساحلی شہر صور کے رہائشیوں کو فوری طور پر انخلا کی وارننگ جاری کی ہے۔ فوج کے عربی زبان کے ترجمان کرنل اویخائے ادرعی نے کہا کہ حزب اللہ کی سرگرمیوں کے باعث اسرائیلی فوج کارروائی کرنے جا رہی ہے، اس لیے شہری فوری طور پر اپنے گھروں کو چھوڑ کر دریائے زہرانی کے شمال کی جانب منتقل ہو جائیں۔

اسی دوران اسرائیلی فضائی حملوں میں صور کے ایک ہسپتال کو نقصان پہنچا اور کم از کم 11 افراد زخمی ہو گئے۔ لبنانی اطالوی ہسپتال کے ڈائریکٹر کے مطابق ہسپتال کی عمارت کو نقصان پہنچنے کے باوجود وہ علاج کی سہولیات جاری رکھے گا۔

حملوں میں ہسپتال کے قریب دو عمارتیں مکمل طور پر تباہ ہو گئیں، جس سے ہسپتال کی کھڑکیاں ٹوٹ گئیں اور چھتوں کو بھی نقصان پہنچا۔ اسی روز صور کے بندرگاہی علاقے پر بھی حملہ کیا گیا، جہاں ایک کشتی تباہ ہو گئی جب کہ دیگر کئی کو نقصان پہنچا۔

واضح رہے کہ امریکی اور اسرائیلی فضائی حملوں میں ایرانی سپریم لیڈر آیت اللہ خامنہ ای کی ہلاکت کے بعد دو مارچ کو لبنانی عسکری تنظیم حزب اللہ کی جانب راکٹ داغے گئے تھے۔ اس کے بعد اسرائیل نے جنوبی لبنان میں حزب اللہ کے خلاف بڑی عسکری کارروائیوں کا آغاز کر دیا تھا۔

لبنانی حکام کے مطابق صور شہر سے ہزاروں افراد نقل مکانی کر چکے ہیں، تاہم اب بھی تقریباً 20 ہزار افراد وہاں موجود ہیں، جن میں 15 ہزار قریبی دیہاتوں سے آنے والے بے گھر افراد شامل ہیں۔