اسرائیل کی لبنانی شہر صور اور دیگر علاقوں سے انخلا کا حکم

یروشلم  (ڈیلی اردو) لبنان جنگ میں بظاہر فائر بندی معاہدے کے نفاذ کے باوجود اسرائیل نے جنوبی لبنان میں اپنی زمینی فوجی کارروائیوں کو کل منگل کو  مزید وسعت دے دی تھی۔

 اس کے ایک دن بعد آج بدھ 27 مئی کو اسرائیل کی فوج نے جنوبی لبنان کے شہر صور (Tyre) اور اس کے نواحی علاقوں کے رہائشیوں کو بھی یہ وارننگ جاری کردی کہ وہ سارا علاقہ خالی کر دیں۔

یروشلم سے موصولہ رپورٹوں کے مطابق اسرائیلی فوج نے اپنی یہ تازہ ترین عسکری تنبیہ اس تناظر میں جاری کی ہے کہ وہ لبنان کی ایران نواز شیعہ ملیشیا حزب اللہ کے ساتھ اپنی مقابلتاﹰ شدید ہوتی جا رہی کارروائیوں میں حزب اللہ کے ٹھکانوں کو نشانہ بنانے کی کارروائیوں کو مزید پھیلا دینا چاہتی ہے۔

اسرائیلی فوج کے عربی زبان کے ترجمان نے سوشل میڈیا پلیٹ فارم ایکس پر جاری کردہ ایک بیان میں تحریری پوسٹ کے ساتھ ایک نقشہ بھی شائع کیا۔ اس میں جنوبی لبنان کے شہر صور کے علاوہ اس کے نواحی علاقے بھی دیکھے جا سکتے تھے۔

اس پوسٹ میں اسرائیلی فوجی ترجمان نے کہا، ’’نقشے میں دکھائے گئے صور شہر اور اس کے نواحی علاقوں اور کیمپوں کے رہائشیوں کے نام فوری وارننگ: دہشت گرد تنظیم حزب اللہ کی طرف سے کی جانے والی فائر بندی معاہدے کی خلاف ورزیوں کے پیش نظر، اسرئیلی دفاعی افواج مجبور ہو گئی ہیں کہ وہ حزب اللہ کے ‌خلاف پوری طاقت سے کارروائی کریں۔‘‘

ساتھ ہی اس پوسٹ میں مقامی رہائشیوں کو مشورہ دیا گیا کہ وہ پورا مذکورہ علاقہ فوری طور پر خالی کر دیں۔

نیوز ایجسی اے ایف پی نے لکھا ہے کہ اس اسرائیلی فوجی پوسٹ میں مزید کہا گیا، ’’اسرائیلی فوج آپ کو نقصان پہنچانے کا کوئی ارادہ نہیں رکھتی۔ لیکن خود اپنی حفاظت کے لیے آپ کو اپنے گھر اور رہائش گاہیں فوری طور پر خالی کر دینا چاہییں، ان تمام علاقوں میں، جو نقشے میں دکھائے گئے ہیں۔ آپ سب کو نقل مکانی کر کے دریائے زہرانی کے شمال کی طرف چلے جانا چاہیے۔‘‘