اسرائیلی آرمی چیف کا بفورٹ قلعے کا دورہ، حزب اللہ کیخلاف کارروائی جاری رکھنے کا اعلان

یروشلم (ڈیلی اردو) اسرائیلی فوج کے سربراہ لیفٹیننٹ جنرل ایال زامیر نے جنوبی لبنان میں تاریخی بفورٹ قلعے کے اطراف تعینات فوجیوں کا دورہ کیا ہے اور کہا ہے کہ اسرائیل حزب اللہ کے خلاف اپنی کارروائیاں جاری رکھے گا۔

اسرائیلی فوج کے مطابق ایال زامیر نے فوجیوں سے گفتگو کرتے ہوئے کہا کہ اسرائیلی دفاعی افواج لبنانی سرزمین سے خطرات کے خاتمے کے لیے فیصلہ کن کارروائیاں جاری رکھیں گی اور جنگ بندی کی کسی بھی خلاف ورزی پر فوری اور جارحانہ ردعمل دیا جائے گا۔

بیان میں کہا گیا ہے کہ اسرائیلی افواج نے بفورٹ قلعے اور اس کے اطراف کے علاقے کو اپنے کنٹرول میں لے رکھا ہے، جسے فوج ایک اہم اسٹریٹجک مقام قرار دیتی ہے۔

اسرائیلی دعوے کے مطابق قلعے کے نیچے سرنگوں کا ایک نیٹ ورک بھی دریافت کیا گیا ہے، جسے ایران کے حمایت یافتہ گروپ حزب اللہ کی جانب سے سرحدی علاقے میں عسکری استعمال کے لیے استعمال کیا جا رہا تھا۔

ایال زامیر نے مزید کہا کہ جنوبی لبنان میں جاری کارروائیاں امریکہ کی ثالثی میں طے پانے والے معاہدے کے تحت کی جا رہی ہیں، جس کا مقصد خطے میں دیرپا امن قائم کرنا ہے۔

انہوں نے خبردار کیا کہ اسرائیلی افواج یا شہریوں کو کسی بھی خطرے کی صورت میں فوری طور پر جوابی کارروائی کی جائے گی۔ انہوں نے لبنانی فوج پر زور دیا کہ وہ معاہدے کے تحت اپنی ذمہ داریاں پوری کرے اور علاقے کو حزب اللہ کے عناصر اور ان کے ڈھانچے سے پاک کرے۔