اسرائیلی حملہ: ایرانی بحری سربراہ علی رضا تنگسیری دیگر سینئر کمانڈروں سمیت ہلاک

تل ابیب (ڈیلی اردو) اسرائیل کے وزیرِ دفاع اسرائیل کاٹز نے جمعرات کے روز بتایا ہے کہ ایرانی پاسدارانِ انقلاب کی بحریہ کے سربراہ کموڈور علی رضا تنگسیری کو دیگر سینئر بحری کمانڈروں کے ساتھ بدھ کی رات کیے گئے ایک فضائی حملے میں ہلاک کر دیا گیا۔

کاٹز کے مطابق، تنگسیری ان بمباری آپریشنز کے ذمہ دار تھے جن کی وجہ سے تجارتی بحری جہاز ابنائے ہرمز کے تنگ آبی راستے سے گزرنے سے روکے گئے تھے۔ انہوں نے کہا کہ یہ حملہ اعلیٰ ایرانی فوجی اہلکاروں کے لیے ایک "صاف پیغام" ہونا چاہیے کہ اسرائیلی فوج انہیں تلاش کر کے نشانہ بنائے گی۔

کموڈور علی رضا تنگسیری 2018 میں پاسدارانِ انقلاب کی بحریہ کے کمانڈر مقرر ہوئے تھے، اور اس سے قبل 2010 سے بحریہ کے ڈپٹی کمانڈر کے طور پر خدمات انجام دے رہے تھے۔

تنگسیری سے منسوب ایک ایکس اکاؤنٹ رواں ماہ فعال ہوا، جس سے ایرانی ذرائع ابلاق کئی بیانات جاری کرتے رہے ہیں۔ ان بیانات میں آبنائے ہرمز پر ایران کے موقف کو اجاگر کیا گیا، اور کہا گیا تھا کہ “ایران کے خلاف جارحیت کرنے والوں سے وابستہ کسی بھی جہاز کو وہاں سے گزرنے کا حق نہیں ہے۔”

تنگسیری ماضی میں امریکہ اور اسرائیل کے خلاف متعدد بیانات دے چکے ہیں۔ 2019 میں انھوں نے دھمکی دی تھی کہ اگر ایران کی تیل کی برآمدات میں خلل پڑا تو آبنائے ہرمز کو بند کر دیا جائے گا۔ 

اسی سال، ایران کی جانب سے آبنائے ہرمز کے قریب نگرانی کرنے والے ایک امریکی ڈرون کو مار گرائے جانے کے بعد امریکہ نے پاسدارانِ انقلاب کے دیگر کمانڈروں کے ساتھ تنگسیری پر بھی پابندی عائد کی تھی۔