اسرائیلی قیادت کے مراکز کو نشانہ بنایا گیا، ایران کا دعویٰ

تہران (ڈیلی اردو) ایران کی سپاہ پاسداران انقلاب اسلامی (آئی آر جی سی) نے دعویٰ کیا ہے کہ اس نے اپنے تازہ میزائل حملوں میں اسرائیلی وزیر اعظم بینجمن نیتن یاہو کے دفتر اور اسرائیلی فضائیہ کے کمانڈر کے ہیڈکوارٹر کو نشانہ بنانے کی کوشش کی۔

ایرانی خبر رساں ادارے فارس نیوز ایجنسی کے مطابق پاسداران انقلاب نے ایک بیان میں کہا کہ حملوں میں ’’وزیر اعظم کے دفتر اور فضائیہ کے کمانڈر کے ہیڈکوارٹر‘‘ کو ٹارگٹ کیا گیا۔ بیان میں مزید کہا گیا کہ ان کارروائیوں میں ’’خیبر میزائل‘‘ استعمال کیے گئے۔

تاہم اس ایرانی دعوے کی آزاد ذرائع سے تصدیق نہیں ہو سکی ہے، جبکہ اسرائیلی حکام کی جانب سے فوری طور پر کسی جانی نقصان یا اہم تنصیبات کو نقصان پہنچنے کی تصدیق سامنے نہیں آئی۔

ریاض میں مریکی سفارتخانے پر ڈرون حملہ

سعودی عرب کے دارالحکومت ریاض کے سفارتی علاقے میں منگل 3 مارچ کی صبح زور دار دھماکوں کی آوازیں سنی گئیں۔ عینی شاہدین کے مطابق سفارتی کوارٹر میں سیاہ دھوئیں کے بادل دیکھے گئے۔

خبر رساں ادارے روئٹرز نے دو باخبر ذرائع کے حوالے سے رپورٹ کیا کہ دھماکے کے بعد ریاض میں امریکی سفارتخانے کی عمارت میں آگ لگ گئی۔ اسی طرح اے ایف پی نے چار عینی شاہدین کے حوالے سے دھماکوں اور دھوئیں کی موجودگی کی اطلاع دی۔

سعودی فوج کے ترجمان کے مطابق امریکی سفارتخانے کو دو ڈرون حملوں نے نشانہ بنایا۔

 امریکی سفارتخانے نے سوشل میڈیا پلیٹ فارم ایکس (X) پر جاری بیان میں کہا کہ واقعے کے نتیجے میں ’’عمارت میں محدود آگ اور معمولی مادی نقصان‘‘ ہوا ہے۔

امریکی مشن برائے سعودی عرب نے جدہ، ریاض اور ظہران میں موجود اپنے عملے کے لیے "شیلٹر اِن پلیس" ہدایت جاری کرتے ہوئے خطے میں غیر ضروری نقل و حرکت محدود کرنے کا اعلان کیا ہے۔