اسلام آباد: علامہ مسعود الرحمان عثمانی کی ہلاکت میں ملوث سپاہ محمد کے 3 ملزمان گرفتار

اسلام آباد (ڈیلی اردو) کالعدم اہلسنت والجماعت و سپاہ صحابہ اور سنی علما کونسل کے مرکزی رہنما علامہ مسعود الرحمان عثمانی کے ہلاکت میں ملوث 3 ملزمان کو گرفتار کرلیا گیا۔ مسعود الرحمان عثمانی کو گزشتہ دنوں اسلام آباد میں ٹارگٹ کلنگ کا نشانہ بنایا گیا تھا۔

سکیورٹی ذرائع کے مطابق علامہ مسعود الرحمان عثمانی کے ہلاکت میں ملوث 3 ملزمان کو مختلف شہروں سے گرفتار کیا گیا۔

سکیورٹی ادروں نے فوٹیج کی مدد سے 4 ملزمان کی نشاندہی کی تھی جس کے بعد ایک ملزم کو منڈی بہاؤالدین، ایک کو راولپنڈی اور ایک ملزم کو اسلام آباد سے گرفتار کیا گیا۔

سکیورٹی ذرائع کے مطابق گرفتار ملزمان کا تعلق فرقہ وارانہ عسکریت پسند تنظیم سپاہ محمدسے ہے۔

یاد رہے کہ 5 جنوری کو وفاقی دارالحکومت اسلام آباد میں سنی علما کونسل پاکستان کے مرکزی ڈپٹی جنرل سیکرٹری اور علامہ مسعود الرحمان عثمانی قاتلانہ حملے میں ہلاک ہوگئے تھے جبکہ فائرنگ کے واقعہ میں ایک شخص زخمی بھی ہوا تھا۔

مسعود عثمانی کے قتل کے بعد پولیس ذرائع کا کہنا تھا کہ اسلام آباد کے غوری ٹاؤن میں نامعلوم موٹرسائیکل سواروں نے گاڑی پر فائرنگ کی جس کے نتیجے میں مولانا مسعود الرحمان عثمانی شدید زخمی ہوئے جنہیں طبی امداد کے لیے پمز ہسپتال منتقل کیا گیا تاہم وہ جانبر نہ ہوسکے تھے۔