اسلام آباد میں خودکش حملہ ناکام، خاتون حملہ آور گرفتار، وزیراعلیٰ بلوچستان

کوئٹہ (ڈیلی اردو/ بی بی سی) پاکستان کے شورش زدہ صوبہ بلوچستان کے دارلحکومت کوئٹہ میں وزیر اعلیٰ سیکریٹریٹ میں ایک خاتون کو میڈیا کے سامنے پیش کرتے ہوئے یہ دعویٰ کیا گیا کہ انھیں کالعدم تنظیموں نے اسلام آباد میں خودکُش حملے کے لیے تیار کیا تھا۔

اس موقع پر وزیر اعلیٰ بلوچستان میر سرفراز بگٹی نے دیگر حکام کے ہمراہ ایک پریس کانفرنس سے خطاب کرتے ہوئے کہا کہ ہمارے ریاستی اداروں نے اس کو ناکام بنایا۔

اس موقع پر نہ صرف خیرالنساء نامی یہ خاتون موجود تھی بلکہ ان کے والد بھی موجود تھے۔

پریس کانفرنس کے دوران نہ صرف صحافیوں سے درخواست کی گئی کہ وہ خاتون سے کوئی سوال نہ کریں بلکہ وزیر اعلیٰ نے بھی کہا کہ خاتون کی حالت ایسی نہیں ہے کہ وہ کسی سوال کا جوب دیں بلکہ انھوں نے کہا کہ سوالات کا جواب وہ دیں گے۔

وزیر اعلیٰ نے کہا کہ ’خیرالنساء کے بارے میں پہلے یہ معلوم ہوا کہ وہ لاپتہ ہوگئی ہیں جس پر خفیہ اداروں نے کارروائی کا آغاز کیا جس کے دوران یہ پتہ چلا کہ وہ لاپتہ نہیں بلکہ ایک کالعدم تنظیم کے کیمپ میں تربیت حاصل کررہی ہے۔‘

انھوں نے دعویٰ کیا کہ ’نہ صرف اس خاتون کا استحصال کیا گیا بلکہ ان کو یہ دھمکی دی گئی کہ اگر انھوں نے خود کُش حملہ نہیں کیا تو ان کے والد کو بھی ماردیا جائے گا۔‘

انھوں نے بتایا کہ ان خاتون نے جب اسلام آباد جانے کے لیے تربت سے بس میں سفر کا آغاز کیا تو خفیہ اداروں کو اس بارے میں معلوم ہوا جس پر ان کو گرفتار کرلیا گیا۔‘

ان کا کہنا تھا کہ ’اگر یہ خاتون اسلام آباد پہنچتی اور خودکُش حملہ کرنے میں کامیاب ہو جاتیں تو نہ صرف وہاں انسانی جانوں کا ضیاع ہوتا بلکہ اس سے دنیا بھر میں پاکستان کی ساکھ کو بھی شدید نقصان پہنچتا۔‘

انھوں نے کہا کہ ’ہماری قیادت کی وجہ سے پاکستان نے بین الاقوامی سطح پر جس انداز سے اپنا امیج بنایا ہے، دُشمن کی یہ کوشش ہے کہ کس طرح اس کو متاثر کیا جائے لیکن ہمارے خفیہ اداروں نے اس سازش کو ناکام بنایا۔‘

انھوں نے کالعدم تنظیموں پر الزام لگایا کہ ہم اپنے خواتین کے لیے ہارودڑ اور آکسفرڈ کے دروازے کھول رہے ہیں جبکہ کالعدم تنظیمیں ان کو خودکُش جیکٹ پہنا رہی ہیں۔‘

انھوں نے کہا کہ گرفتار ہونے والی خاتون کو ان کے والدین کے حوالے کر رہے ہیں اور ان سے یہ درخواست کرتے ہیں کہ وہ اپنی بچی پر نظر رکھیں۔‘

وزیر اعلیٰ نے کہا کہ ’تاریخ میں بلوچ خواتین کبھی بھی کسی جنگ کا حصہ نہیں رہی ہیں بلکہ وہ امن کا حصہ رہی ہیں اور انھوں نے ہمیشہ امن کے لیے کردار ادا کیا مگر ان کے بقول کالعدم تنظیمیں ان کو جنگ میں دھکیل رہی ہیں۔‘