افغان طالبان دہشتگردوں کی پشت پناہی چھوڑنے کو تیار نہیں، پھر جنگ ہی متبادل ہو گی، خواجہ آصف

اسلام آباد (ڈیلی اردو) قومی اسمبلی کے اجلاس سے خطاب کرتے ہوئے پاکستان کے وزیر دفاع خواجہ آصف نے کہا ہے کہ افغانستان میں طالبان حکومت کی جانب سے اس بات کی تحریری ضمانت دینے سے انکار کیا جا رہا ہے کہ وہ شدت پسندوں کی پشت پناہی ختم کرے گی اور افغان سرزمین پاکستان کے خلاف استعمال نہیں ہوگی۔

وزیر دفاع کے مطابق اس معاملے پر کابل حکومت کے ساتھ “19، 19 گھنٹے طویل گفت و شنید” ہوئی، تاہم افغان فریق زبانی بات چیت پر آمادہ ہے لیکن کسی تحریری معاہدے کے لیے تیار نہیں۔

خواجہ آصف نے ایوان کو بتایا کہ پاکستان کا مؤقف واضح ہے کہ افغان سرزمین سے پاکستان پر حملے کرنے والے عناصر کی پشت پناہی ختم کی جائے، تاہم ان کے مطابق طالبان حکومت اس مؤقف پر اتفاق نہیں کر رہی۔

انہوں نے کہا کہ اس معاملے پر پاکستان کی جانب سے قطر، ترکی اور سعودی عرب نے بھی ثالثی کا کردار ادا کیا، لیکن “کوئی قابل عمل حل سامنے نہیں آ سکا۔”

وزیر دفاع نے سخت لہجہ اختیار کرتے ہوئے کہا کہ اگر صورتحال اسی طرح برقرار رہی تو پھر ایک ہی متبادل رہ جاتا ہے، اور ان کے الفاظ میں “تنگ آمد بجنگ آمد، پھر تو جنگ ہی ہو گی۔”

انہوں نے یہ بھی کہا کہ ممکن ہے اس وقت بھی کسی تیسرے ملک کے ذریعے رابطوں کی کوششیں جاری ہوں، تاہم اس حوالے سے وہ حتمی طور پر کچھ نہیں کہہ سکتے۔

خواجہ آصف نے اپنے خطاب میں یہ بھی کہا کہ ماضی میں وفاقی حکومت کو خیبرپختونخوا میں مکمل سیاسی تعاون حاصل نہیں تھا، تاہم اب دہشتگردی کے خلاف تمام ادارے اور صوبائی حکومتیں مل کر کام کر رہی ہیں۔

اسلام آباد اور کابل کے درمیان یہ کشیدگی ایسے وقت میں سامنے آئی ہے جب پاکستان طویل عرصے سے افغانستان پر الزام عائد کرتا رہا ہے کہ اس کی سرزمین پاکستان میں حملوں کے لیے استعمال ہو رہی ہے، جبکہ طالبان حکومت ان الزامات کی تردید کرتی ہے۔