افغانستان: جلال آباد میں داعش کا خودکش حملہ، 4 پولیس اہلکاروں سمیت 16 شہری شہید

کابل (ڈیلی اردو) افغانستان کے مشرقی شہر جلال آباد میں ہونے والے خودکش حملے کے نتیجے میں 16 افراد شہید اور 12 زخمی ہوگئے۔

غیر ملکی خبر رساں ایجنسی کے مطابق صوبہ ننگرہار کے گورنر کے ترجمان نے کہا کہ ‘پیدل چل کر آنے والے خودکش حملہ آور نے مقامی پولیس چیک پوائنٹ کے قریب خود کو دھماکا خیز ڈیوائس کے ذریعے اڑا دیا۔’

عطااللہ خوغیانی نے کہا کہ ‘خودکش حملے میں 4 پولیس اہلکاروں سمیت 16 شہری شہید اور سیکیورٹی اہلکاروں سمیت 12 افراد زخمی ہوئے۔’ شہدا میں چار بچے بھی شامل ہیں۔

حملے کی ذمہ داری عالمی دہشت گرد تنظیم داعش نے قبول کرلی۔

https://twitter.com/MossadNews/status/1139183770651770880?s=19

واضح رہے کہ افغانستان میں دہشت گردی کی حالیہ لہر میں درجنوں شہری اور سیکیورٹی اہلکار جان سے ہاتھ دھو بیٹھے ہیں۔

افغانستان میں 18 سالہ جنگ کے بعد طالبان کے افغان امن عمل کے لیے امریکا کے خصوصی نمائندے زلمے خلیل زاد سے مذاکرات جاری ہیں، تاہم حتمی معاہدے کے لیے فریقین کے درمیان ابھی کئی نکات پر اتفاق ہونا باقی ہے۔