افغانستان سرحد پر ایرانی فورسز کی کارروائی، 6 دہشت گرد ہلاک

تہران (ڈیلی اردو) ایرانی بارڈر گارڈز نے افغانستان سے دراندازی کی کوشش ناکام بناتے ہوئے 6 مبینہ دہشت گردوں کو ہلاک کرنے کا دعویٰ کیا ہے۔

ایرانی میڈیا کے مطابق ایرانی بارڈر گارڈز کے کمانڈر علی اکبر جاویدان نے بتایا کہ صوبہ سیستان و بلوچستان کے سرحدی ضلع زابل میں افغانستان کی سرحد سے داخل ہونے کی کوشش کرنے والے افراد بارڈر گارڈز کے ساتھ جھڑپ میں ہلاک ہوئے۔

ایرانی حکام کے مطابق ہلاک ہونے والے افراد کے قبضے سے اسلحہ بھی برآمد کیا گیا، جسے تحویل میں لے لیا گیا ہے۔

کمانڈر علی اکبر جاویدان کے مطابق یہ افراد ایران میں داخل ہو کر سرحدی چوکیوں کو نشانہ بنانے کا ارادہ رکھتے تھے۔

ایرانی حکام نے ہلاک ہونے والوں کو ایک دہشت گرد گروہ سے منسلک قرار دیا، تاہم اس گروہ کا نام ظاہر نہیں کیا گیا۔