افغانستان سے دراندازی کی کوشش ناکام: 37 دہشت گرد ہلاک، 80 سے زائد زخمی

اسلام آباد (ڈیلی اردو) پاکستان کے وزیر اطلاعات کے مطابق افغان سرحد عبور کرنے کی کوشش کرنے والے شدت پسندوں کے ساتھ جھڑپوں میں 37 دہشت گرد ہلاک ہو گئے ہیں۔

وفاقی وزیراطلاعات عطا اللہ تارڑ نے ایکس پر اپنی پوسٹ میں بتایا کہ 2 اور 3 اپریل کی رات شورش زدہ صوبے خیبر پختونخوا کے قبائلی ضلع شمالی وزیرستان کے سرحدی علاقے غلام خان سیکٹر میں سرحدی چوکی پر افغان طالبان کی جانب سے حملے کی کوشش کو مکمل طور پر ناکام بنایا گیا۔

انہوں نے کہا کہ پاک فوج نے موثر اور بروقت کارروائی کرتے ہوئے 37 دہشت گردوں کو ہلاک کردیا جبکہ 80 سے زائد زخمی ہو گئے۔

وزیر اطلاعات نے مزید بتایا کہ افغانستان میں موجود دہشت گردوں کے خلاف جاری آپریشن للحق میں پانچ اپریل شام پانچ بجے تک ہلاک کیے گئے دہشت گردوں کی تعداد 796 تک پہنچ گئی جب کہ 1043 زخمی ہیں۔

عطا تارڑ نے مزید بتایا کہ آپریشن میں تاحال دہشت گردوں اور افغان رجیم کی 286 چوکیاں تباہ ہوچکی ہیں جبکہ 44 چوکیاں قبضے میں لے لی گئیں۔

انہوں نے کہا کہ آپریشن کے دوران 249 ٹینک، بکتر بند گاڑیاں، توپیں اور ڈرون تباہ کردیے گئے، افغانستان بھر میں دہشتگردوں اور ان کے سہولت کاروں کے 81 ٹھکانوں کو موثر طور پر نشانہ بنایا گیا۔