افغانستان میں 37 مقامات پر فضائی حملوں میں 331 طالبان ہلاک، 500 سے زائد زخمی، پاکستان

اسلام آباد (نمائندہ ڈیلی اردو) پاکستان کے وزیر اطلاعات عطاء اللہ تارڑ نے افغانستان کے خلاف کارروائیوں کی تازہ تفصیلات شیئر کی ہیں۔

ان کے مطابق آپریشن کے دوران اب تک 331 افغان طالبان ہلاک اور 500 سے زائد زخمی ہوئے ہیں۔

انہوں نے دعویٰ کیا کہ 104 چیک پوسٹیں مکمل طور پر تباہ کی گئیں جبکہ 22 چیک پوسٹوں پر قبضہ کیا گیا۔ مزید یہ کہ 163 ٹینک اور مسلح گاڑیاں تباہ کی جا چکی ہیں۔

وزیر اطلاعات کے مطابق افغانستان بھر میں 37 مقامات کو فضائی کارروائی میں مؤثر طور پر نشانہ بنایا گیا۔

دوسری جانب پاکستانی فوج کے ترجمان لیفٹیننٹ جنرل احمد شریف چوہدری نے جمعے کو پریس کانفرنس سے خطاب کرتے ہوئے کہا کہ افغان طالبان سے جھڑپوں میں اب تک 12 پاکستانی فوجی ہلاک ہو چکے ہیں، 27 زخمی ہیں جبکہ ایک سپاہی لاپتہ ہے۔

ان کے مطابق افغان طالبان نے پاکستان میں 15 سیکٹرز کے 53 مقامات پر فائرنگ اور ریڈ کیے، جو ایک عالمی سطح پر دہشتگرد تنظیم قرار دی گئی تنظیم ٹی ٹی پی کے ساتھ مل کر کیے گئے۔

خیال رہے کہ ان اعداد و شمار کی آزادانہ تصدیق نہیں کی جا سکی ہے۔