افغانستان میں 70 عسکریت پسند ہلاک کیے، پاکستان

اسلام آباد (ڈیلی اردو/اے پی/اے ایف پی/روئٹرز) پاکستان نے افغانستان میں کیے گئے فضائی حملوں میں 70 عسکریت پسندوں‘ کی ہلاکت کا دعویٰ کیا ہے۔ ایک پاکستانی سکیورٹی ذریعے نے ’ہلاکتوں کی تعداد 80 ‘ بتائی ہے۔ تاہم ان دعوؤں کے بارے میں کوئی ثبوت پیش نہیں کیے گئے۔

پاکستان کے نائب وزیر داخلہ طلال چوہدری نے جیو نیوز کو بتایا کہ ہفتے اور اتوار کی درمیانی شب افغانستان میں کیے گئے فضائی حملوں میں کم از کم 70 عسکریت پسند ہلاک ہوئے۔ تاہم انہوں نے اس دعوے کے لیے کوئی ثبوت پیش نہیں کیا۔ بعد میں پاکستان کے سرکاری میڈیا نے اطلاع دی کہ حملوں میں ہلاک ہونے والے عسکریت پسندوں کی تعداد 80 تک پہنچ گئی ہے۔

دریں اثنا ایک پاکستانی سکیورٹی ذریعے نے بھی نیوز ایجنسی اے ایف پی کو بتایا کہ ہمسایہ ملک افغانستان پر فضائی حملوں میں ’80 سے زائد‘ عسکریت پسند ہلاک ہوئے۔ اس پاکستانی سکیورٹی ذریعے کے مطابق ہلاکتوں کی تعداد میں اضافے کا امکان ہے۔

 دریں اثناء افغانستان میں موجود اے ایف پی کے صحافی ابھی تک ہلاکتوں کی تعداد کی آزادانہ تصدیق نہیں کر سکے۔ 

افغان وزارت دفاع کے بیان کے مطابق مشرقی افغانستان کے صوبوں ننگرہار اور پکتیکا میں ’’مختلف شہری علاقوں‘‘ کو نشانہ بنایا گیا، جن میں ایک مدرسہ اور متعدد گھر شامل تھے۔ بیان میں ان حملوں کو افغانستان کی فضائی حدود اور خودمختاری کی خلاف ورزی قرار دیا گیا۔

افغان حکومت کے ترجمان ذبیح اللہ مجاہد نے ایکس پر لکھا کہ حملوں میں ’’درجنوں افراد ہلاک اور زخمی ہوئے، جن میں خواتین اور بچے بھی شامل ہیں۔‘‘

ننگرہار صوبے میں افغان ہلال احمر سوسائٹی کے صوبائی ڈائریکٹر مولوی فضل الرحمان فیاض نے بتایا کہ 18 افراد ہلاک اور متعدد زخمی ہوئے۔

دریں اثناء افغانستان کی وزارت خارجہ نے پاکستان کے سفیر کو طلب کر کے ایک احتجاجی مراسلہ دیا ہے۔ 

وزارت کے بیان میں کہا گیا کہ افغانستان کی سرزمین کی حفاظت ’’شریعت کے مطابق اسلامی امارت کی ذمہ داری‘‘ ہے اور ایسے حملوں کے نتائج کی ذمہ داری پاکستان پر عائد ہو گی۔