افغانستان: ہلمند میں اتحادی فوج کا فضائی حملہ،17 پولیس اہلکار جاں بحق

کابل (نیوز ڈیسک) افغانستان کے صوبے ہلمند میں اتحادی فوج کے فضائی حملے میں 17 افغان پولیس اہلکار جاں بحق ہوگئے۔

افغان صوبے ہلمند کے سربراہ صوبائی کونسل عطاء اللہ افغان نے واقعہ کی تصدیق کردی انہوں نے کہا ہے کہ اتحادی فوج کےحملےمیں افغان پولیس اہلکار فرینڈلی فائر کا نشانہ بنے۔

افغان وزارت داخلہ نے واقعے میں ہلاکتوں کی تصدیق کرتے ہوئے کہا ہے کہ واقعےکی حقیقی وجوہات جاننے کیلئے تحقیقات شروع کردی گئی 

خیال رہے کہ مارچ میں افغانستان کے شمالی شہر قندوز میں طالبان کے حملے میں 8 افراد جاں بحق اور 62 زخمی ہوئے تھے۔

اس سے قبل افغان طالبان نے صوبہ قندوز میں قائم آرمی بیس پر حملہ کیا۔ حملے کے نتیجے میں 26 سیکیورٹی اہلکار جاں بحق ہوگئے۔

واضح رہے کہ افغانستان میں 18 سالہ جنگ کے بعد امریکا اور طالبان امن عمل کے لیے براہ راست مذاکرات کررہے ہیں جس کے لیے قطر کے دارالحکومت دوحہ میں طالبان اور امریکی نمائندہ خصوصی کے درمیان مذاکرات کا حالیہ دور رواں ماہ کے آغاز میں ہوا تھا