امریکا: کررونا وائرس پھیلانے کی دھمکی پر دہشتگردی کا مقدمہ درج، دو افراد گرفتار

واشنگٹن (ڈیلی اردو/بی بی سی) امریکہ میں دو افراد کو کورونا وائرس پھیلانے کی دھمکی دینے پر دہشتگردی کے الزام میں گرفتار کر لیا ہے۔

امریکی محکمہ انصاف نے کورونا وائرس کو ایک ‘حیاتیاتی اسلحہ’ قرار دیا ہے اور اس حوالے سے جھوٹ پر پانچ سال تک کی قید ہوسکتی ہے۔

پہلے معاملے میں فلوریڈا کے ایک شخص پر مارچ میں گھریلو تشدد کے الزام میں گرفتار ہوتے وقت پولیس اہلکاروں پر کھانسنے اور تھوکنے کا الزام عائد کیا گیا ہے۔

عدالتی دستاویزات کے مطابق 31 سالہ شخص نے ایک اہلکار سے کہا: ‘مجھے کورونا ہے۔’ بعد میں اس شخص کا نتیجہ منفی آیا۔

اسی طرح ٹیکساس میں ایک شخص پر بھی ایسا ہی مقدمہ قائم کیا گیا ہے کیونکہ اس نے فیس بک پر جھوٹا دعویٰ کیا تھا کہ اس نے سان انتونیو شہر کی سپرمارکیٹس میں کورونا وائرس پھیلانے کے لیے ایک شخص کو رقم ادا کی تھی۔

ادھر امریکی ریاست نیویارک میں قومی پرچم سرنگوں کر دیئے گئے ہیں جہاں کورونا وائرس سے اب تک ایک لاکھ 51 ہزار 171 افراد متاثر جب کہ 6 ہزار 268 افراد ہلاک ہو چکے ہیں۔

جان ہاپکنز یونیورسٹی کے اعداد و شمار کے مطابق اب تک امریکہ میں 14 ہزار 800 سے زائد افراد کورونا وائرس سے ہلاک ہو چکے ہیں۔ جب کہ عالمگیر وبا سے اب تک 4 لاکھ 35 ہزار سے زائد افراد متاثر ہو چکے ہیں۔

دنیا بھر میں اب تک کورونا وائرس سے متاثرہ افراد کی تعداد 15 لاکھ 36 ہزار سے تجاوز کر چکی ہے جب کہ ساڑھے 89 ہزار 877 سے زائد افراد زندگی کی بازی ہار بھی چکے ہیں۔