امریکہ اور اسرائیل کے تہران کے قریب تیل تنصیبات پر حملے، ایران

تہران (ڈیلی اردو/بی بی سی) آج اتوار آٹھ مارچ کو ایران کے سرکاری ٹی وی کو ایک اہلکار نے بتایا کہ امریکہ اور اسرائیل نے ایرانی دارالحکومت اور اس کے قریب تیل کی پانچ تنصیبات پر رات گئے حملے کیے، جس کے نتیجے میں چار افراد ہلاک ہوئے۔

نیشنل ایرانی آئل پروڈکٹس ڈسٹری بیوشن کمپنی کے سی ای او، کرامت ویس کرمی نے سرکاری ٹی وی کو بتایا، ’’گزشتہ شب تہران اور البرز میں تیل کے چار ڈپوز  اور پیٹرولیم مصنوعات کی ترسیل کے ایک مرکز پر دشمن کے طیاروں نے حملہ کیا۔‘‘

انہوں نے مزید کہا، ’’اس واقعے میں ہمارے چار اہلکار، جن میں تیل کے ٹینکرز کے دو ڈرائیور بھی شامل ہیں، مارے گئے۔‘‘ انہوں نے بتایا کہ تنصیبات کو نقصان پہنچا ہے تاہم ’’آگ پر قابو پا لیا گیا‘‘۔

ایرانی ہلالِ احمر کا کہنا ہے کہ تیل کے ڈپوز میں ہونے والے دھماکوں سے فضا میں ’’بڑی مقدار میں زہریلے ہائیڈرو کاربن مرکبات، گندھک (سلفر) اور نائٹروجن آکسائیڈز‘‘ خارج ہوئی ہیں۔ ادارے نے ایک بیان میں خبردار کیا کہ ’’بارش کی صورت میں، یہ پانی انتہائی خطرناک اور شدید تیزابی ہوگا،‘‘ جس سے جلد کے جلنے اور پھیپھڑوں کو شدید نقصان پہنچنے کا خطرہ ہے۔

ایران کے ماحولیاتی حکام نے شہریوں پر زور دیا ہے کہ وہ سانس کے مسائل اور دیگر طبی پیچیدگیوں سے بچنے کے لیے گھروں کے اندر رہیں۔ ویس کرمی نے یہ بھی کہا کہ ایران کے تیل کے ڈپوز  میں ’’پٹرول کے کافی ذخائر‘‘ موجود ہیں۔

واضح رہے کہ 28 فروری کو امریکہ اور اسرائیل نے ایران پر حملے کیے تھے جن میں ایران کے سپریم لیڈر آیت اللہ علی خامنہ ای سمیت متعدد ایرانی رہنما مارے گئے، جس کے بعد شروع ہونے والی جنگ کے اثرات اب پورے مشرق وسطیٰ میں پھیل چکے ہيں۔ 

ایران نے اس کا جواب خطے میں اسرائیل اور امریکی مفادات کو ڈرون اور میزائل حملوں سے نشانہ بنا کر دیا ہے۔