امریکہ: منی سوٹا کے چرچ سے منسلک اسکول میں فائرنگ، 3 بچے ہلاک، 17 زخمی

واشنگٹن (ڈیلی اردو/رائٹرز/اے ایف) امریکی ریاست منی سوٹا کے شہر منی ایپلس میں ایک چرچ سے منسلک کیتھولک اسکول میں فائرنگ کے واقعے میں کم از کم 3 بچے ہلاک اور 17 زخمی ہوگئے، جبکہ حملہ آور بھی مارا گیا۔

ڈیلی اردو کے مطابق پولیس چیف برائن او’ہارا نے بتایا کہ آٹھ اور دس سال کی عمر کے دو بچے اپنی نشستوں پر بیٹھے ہوئے ہلاک ہوئے۔ پولیس چیف کا کہنا تھا کہ حملہ آور کے پاس رائفل، شاٹ گن اور پستول موجود تھے۔ انہوں نے اس واقعے کو "انتہائی سفاکیت اور بزدلی" قرار دیا۔

پولیس کے مطابق زخمیوں میں 14 بچے شامل ہیں جن میں سے دو کی حالت تشویشناک ہے۔

قبل ازیں، رائٹرز اور اے ایف پی نے امریکی محکمہ انصاف کے ایک عہدیدار کے حوالے سے بتایا تھا کہ فائرنگ میں تین افراد ہلاک اور 20 زخمی ہوئے ہیں۔ عہدیدار نے نام ظاہر نہ کرنے کی شرط پر تصدیق کی کہ شوٹر بھی ہلاک ہونے والوں میں شامل ہے۔

یہ واقعہ اس وقت پیش آیا جب اینونساییشن کیتھولک اسکول میں تعلیمی سال کے آغاز کو صرف دو دن ہوئے تھے۔ یہ نجی پرائمری اسکول تقریباً 395 طلبہ پر مشتمل ہے اور یہ کیتھولک چرچ سے منسلک ہے۔

امریکی صدر ڈونلڈ ٹرمپ نے ٹروتھ سوشل پر ردعمل دیتے ہوئے کہا کہ انہیں واقعے کے بارے میں مکمل بریفنگ دی گئی ہے، جبکہ ایف بی آئی نے فوری طور پر ردعمل ظاہر کیا اور ٹیم موقع پر موجود ہے۔

مقامی پولیس کے مطابق "فی الحال کمیونٹی کو کوئی فعال خطرہ نہیں" جبکہ والدین کے لیے ری یونفیکیشن زون قائم کیا گیا ہے تاکہ وہ اپنے بچوں سے ملاقات کر سکیں۔

مینیسوٹا کے گورنر ٹم والز نے ایکس پر کہا کہ وہ تازہ ترین معلومات فراہم کرتے رہیں گے اور متاثرہ بچوں و اساتذہ کے لیے دعاگو ہیں۔

یہ واقعہ ایسے وقت میں سامنے آیا ہے جب حالیہ دنوں میں امریکی کالج کیمپسز پر متعدد جھوٹی شوٹنگ رپورٹس درج کی گئی تھیں۔