امریکہ کا ایران کے خلاف بڑے حملے، ہزاروں اہداف نشانہ بنائے گئے، وزیرِ دفاع

واشنگٹن (ڈیلی اردو) امریکی وزیرِ دفاع پیٹ ہیگستھ نے کہا ہے کہ ایران کے خلاف جنگ کے اہداف واضح ہیں اور ان میں کسی قسم کی کوئی تبدیلی نہیں آئی۔

جمعرات کو نیوز کانفرنس کرتے ہوئے اُن کا کہنا تھا کہ امریکہ نے ایران میں ہزاروں اہداف کو نشانہ بنایا ہے، جبکہ جمعرات کو بھی بڑا سٹرائیک پیکج متوقع ہے۔

انہوں نے کہا کہ ایران کے میزائل لانچرز، دفاعی صنعت اور بحریہ کو نشانہ بنانا امریکی اہداف میں شامل ہے، ساتھ ہی یہ یقینی بنانا بھی مقصد ہے کہ ایران جوہری ہتھیار حاصل نہ کر سکے۔

وزیرِ دفاع کے مطابق ایران نے سرنگوں، راکٹوں، میزائلوں اور ڈرونز پر سرمایہ کاری کی، تاہم امریکہ انہیں مسلسل نشانہ بنا رہا ہے۔

انہوں نے مزید کہا کہ امریکی صلاحیتوں میں اضافہ ہو رہا ہے جبکہ ایران کی دفاعی پوزیشن کمزور ہوئی ہے اور اس کا فضائی دفاعی نظام شدید متاثر ہوا ہے۔

پیٹ ہیگستھ کے مطابق ایرانی بیلسٹک میزائل اور امریکی افواج کے خلاف ڈرون حملوں میں نمایاں کمی آئی ہے۔

انہوں نے یہ بھی کہا کہ امریکہ نے ایرانی بحریہ کے متعدد بحری جہازوں کو نقصان پہنچایا یا غرق کیا ہے۔

ادھر جوائنٹ چیفس آف سٹاف کے چیئرمین جنرل ڈین کین کے مطابق امریکہ ایران کے مشرقی اور جنوبی علاقوں میں ڈرونز کو ناکارہ بنانے کے لیے کارروائیاں کر رہا ہے، جبکہ اپاچی ہیلی کاپٹر بھی ان حملوں میں حصہ لے رہے ہیں۔