امریکہ کے وزیر خارجہ کا پاکستان اور بھارت سے رابطہ، کشیدگی کم کرنے پر زور

واشنگٹن (نمائندہ ڈیلی اردو) امریکہ کے وزیر خارجہ مارکو روبیو نے بدھ کے روز پاکستان اور بھارت کے وزرائے خارجہ سے علیحدہ علیحدہ گفتگو کی ہے۔ امریکی محکمہ خارجہ کے مطابق ان رابطوں کا مقصد 22 اپریل کو انڈیا کے زیر انتظام کشمیر میں پہلگام کے مقام پر ہونے والے دہشت گرد حملے کے بعد پیدا ہونے والی کشیدگی کو کم کرنا اور علاقائی امن کو فروغ دینا تھا۔

امریکی بیان میں کہا گیا کہ وزیر خارجہ مارکو روبیو نے وزیراعظم شہباز شریف پر زور دیا کہ وہ اس سفاکانہ حملے کی مذمت کریں اور اس کی شفاف تحقیقات میں تعاون فراہم کریں۔ مارکو روبیو نے کہا کہ پاکستان، انڈیا کے ساتھ کشیدگی کم کرنے، براہ راست روابط بحال کرنے اور جنوبی ایشیا میں امن و استحکام کے لیے تعمیری کردار ادا کرے۔

امریکی وزارت خارجہ کے مطابق دونوں رہنماؤں نے دہشت گرد عناصر کو ان کی گھناؤنی کارروائیوں پر جوابدہ بنانے کے اپنے عزم کا اعادہ کیا۔

اسی روز، امریکی وزیر خارجہ نے بھارتی وزیر خارجہ سبرامنیم جے شنکر سے بھی فون پر رابطہ کیا۔ امریکی بیان کے مطابق مارکو روبیو نے پہلگام حملے میں جانوں کے ضیاع پر افسوس کا اظہار کرتے ہوئے دہشت گردی کے خلاف بھارت کے ساتھ کھڑے رہنے کے عزم کی تجدید کی۔ ان کا کہنا تھا کہ امریکہ خطے میں کشیدگی میں کمی اور امن و سلامتی کے قیام کے لیے بھارت کے پاکستان کے ساتھ تعاون کی حوصلہ افزائی کرتا ہے۔

جمعرات کی صبح بھارتی وزیر خارجہ جے شنکر نے سماجی رابطوں کی ویب سائٹ ‘ایکس’ پر بتایا کہ ان کی امریکی ہم منصب سے گفتگو ہوئی، جس میں پہلگام حملے کے پس پردہ عناصر اور منصوبہ سازوں کو انصاف کے کٹہرے میں لانے کے عزم کا اظہار کیا گیا۔

یہ رابطے ایک ایسے وقت میں ہوئے ہیں جب جنوبی ایشیا میں سیکیورٹی صورتحال مسلسل کشیدہ ہے اور دونوں ہمسایہ ممالک کے درمیان سفارتی تناؤ میں اضافہ دیکھنے میں آ رہا ہے۔