امریکی صدر ٹرمپ کو ایران پر ممکنہ حملے کی تیاری سے آگاہ کر دیا گیا

واشنگٹن (ڈیلی اردو) امریکی صدر ڈونلڈ ٹرمپ کو اعلیٰ قومی سلامتی حکام نے آگاہ کیا ہے کہ امریکی فوج سنیچر تک ایران پر ممکنہ حملے کے لیے تیار ہو سکتی ہے، تاہم صدر نے تاحال کوئی حتمی فیصلہ نہیں کیا۔

وائٹ ہاؤس میں اس معاملے پر مسلسل مشاورت جاری ہے اور حملے سے جڑے خطرات، ممکنہ ایرانی ردعمل اور سیاسی و عسکری نتائج کا جائزہ لیا جا رہا ہے۔ حکام کے مطابق کارروائی کے وقت کا حتمی تعین نہیں کیا گیا اور یہ ہفتے سے آگے بھی جا سکتا ہے۔

پینٹاگون آئندہ چند روز میں مشرقِ وسطیٰ سے بعض اہلکاروں کو عارضی طور پر یورپ یا امریکہ منتقل کر رہا ہے تاکہ ممکنہ ایرانی جوابی کارروائی سے بچاؤ یقینی بنایا جا سکے۔ ترجمان نے اس پر تبصرہ کرنے سے گریز کیا ہے۔

وائٹ ہاؤس کی پریس سیکریٹری کیرولین لیویٹ کا کہنا ہے کہ ایران کے معاملے پر مختلف آپشن زیر غور ہیں تاہم صدر کی اولین ترجیح سفارت کاری ہے۔

ادھر مشرقِ وسطیٰ میں امریکی عسکری موجودگی میں نمایاں اضافہ دیکھا جا رہا ہے۔ 

رپورٹس کے مطابق امریکا نے ایران پر یومیہ 800 فضائی حملے کرنے کی صلاحیت حاصل کر لی ہے، جو کسی بھی ممکنہ ایرانی ردعمل کے اثر کو زائل کرنے کے لیے کافی سمجھی جا رہی ہے۔

رپورٹ میں کہا گیا ہے کہ خطے میں امریکی جنگی سازوسامان اور فوجی موجودگی میں اضافہ ہو رہا ہے، جس سے کشیدگی میں اضافے کا خدشہ ظاہر کیا جا رہا ہے۔

امریکی طیارہ بردار بحری جہاز یو ایس ایس ابراہم لنکن ایران کے مزید قریب پہنچ گیا ہے اور ایرانی ساحل سے اس کا فاصلہ کم ہو کر تقریباً 240 کلو میٹر رہ گیا ہے، جبکہ دنیا کے بڑے جنگی بحری جہازوں میں شمار ہونے والا یو ایس ایس جیرالڈ آر فورڈ بھی خطے کی جانب پیش قدمی کر رہا ہے۔

دوسری جانب ایک سینیئر امریکی اہلکار کے مطابق امریکہ آئندہ چند ماہ میں شام میں موجود اپنی فوج کی بڑی تعداد واپس بلانے کی تیاری کر رہا ہے۔ انسدادِ دہشت گردی مہم کے تحت امریکی فوج 2015 سے شام میں موجود ہے۔