امریکی صدر ڈونلڈ ٹرمپ کا ایران پر حملے کا عندیہ

واشنگٹن (ڈیلی اردو) امریکی صدر ڈونلڈ ٹرمپ نے ایران کے خلاف محدود فوجی کارروائی کے امکان پر غور کرنے کا عندیہ دے دیا ہے، جس کے بعد خطے میں کشیدگی مزید بڑھ گئی ہے۔

وائٹ ہاؤس میں میڈیا سے گفتگو کے دوران ایک صحافی نے سوال کیا کہ کیا وہ ایران پر معاہدے کے لیے دباؤ ڈالنے کی غرض سے محدود پیمانے پر حملے پر غور کر رہے ہیں؟ اس پر صدر ٹرمپ نے چند لمحوں کے توقف کے بعد کہا، ’’میرے خیال میں میں یہ کہہ سکتا ہوں کہ میں ایسا سوچ رہا ہوں۔‘‘

اس سے قبل امریکی اخبار وال سٹریٹ جرنل نے رپورٹ کیا تھا کہ صدر ٹرمپ ایران کے خلاف محدود فوجی حملے کے مختلف آپشنز کا جائزہ لے رہے ہیں تاکہ تہران کو جوہری معاہدے سے متعلق امریکی شرائط تسلیم کرنے پر آمادہ کیا جا سکے۔ رپورٹ کے مطابق ممکنہ کارروائی میں ایرانی فوجی یا سرکاری تنصیبات کو نشانہ بنایا جا سکتا ہے، جبکہ عدم تعمیل کی صورت میں کارروائی کو وسعت دینے کے امکانات بھی زیر غور ہیں۔

دوسری جانب ایرانی وزیر خارجہ عباس عراقچی  نے کہا ہے کہ ایران ایک ممکنہ معاہدے کے مسودے پر کام کر رہا ہے اور اسے آئندہ چند روز میں امریکی خصوصی ایلچی کے حوالے کیا جائے گا۔

ادھر امریکہ نے خطے میں اپنی عسکری موجودگی میں اضافہ کر دیا ہے۔ اس تعیناتی میں دنیا کا سب سے بڑا طیارہ بردار جنگی جہاز  یو ایس ایس جیرالڈ آر فورڈ بھی شامل ہے جو بتدریج مشرقِ وسطیٰ کی جانب بڑھ رہا ہے۔

تجزیہ کاروں کے مطابق سفارتی رابطوں اور عسکری تیاریوں کے بیک وقت جاری رہنے سے خطے میں غیر یقینی صورتحال میں اضافہ ہو رہا ہے، اور کسی بھی ممکنہ کارروائی کے اثرات وسیع ہو سکتے ہیں۔