امریکی صدر کا ایران کو سخت انتباہ، معاہدہ نہ ہوا تو ”بہترین ہتھیار“ استعمال ہوں گے

واشنگٹن (ڈیلی اردو) امریکی صدر ڈونلڈ ٹرمپ نے خبردار کیا ہے کہ امریکہ اپنے بحری جہازوں کو جدید ترین اور “بہترین ہتھیاروں” سے لیس کر رہا ہے، اور اگر ایران کے ساتھ معاہدہ نہ ہوا تو ان ہتھیاروں کو استعمال کیا جائے گا۔

جمعے کے روز نیویارک پوسٹ کو دیے گئے انٹرویو میں صدر ٹرمپ کا کہنا تھا کہ اس حوالے سے 24 گھنٹوں میں صورتحال واضح ہو جائے گی۔ انہوں نے کہا، “ہم اپنے جہازوں پر بہترین ہتھیار لاد رہے ہیں، یہاں تک کہ ایسے ہتھیار بھی جو مکمل تباہی کے لیے استعمال ہوتے ہیں۔ اگر معاہدہ نہ ہوا تو ہم انہیں نہایت مؤثر انداز میں استعمال کریں گے۔”

صدر ٹرمپ نے ایران پر عدم اعتماد کا اظہار کرتے ہوئے کہا کہ “ایرانی ایسے لوگ ہیں جن کے بارے میں یہ کہنا مشکل ہے کہ وہ سچ بولتے ہیں یا نہیں۔”

بعدازاں ٹروتھ سوشل پر اپنے بیان میں انہوں نے کہا کہ ایرانی قیادت کے لیے زندہ رہنے کا واحد راستہ مذاکرات ہے۔ ان کا مزید کہنا تھا کہ ایران کے پاس بین الاقوامی آبی گزرگاہوں پر محدود وقت کے لیے دباؤ ڈالنے کے علاوہ کوئی مؤثر آپشن نہیں ہے۔