انڈین فضائیہ کے سابق افسر پاکستانی انٹیلیجنس ایجنٹس کے ساتھ مبینہ روابط کے الزام میں گرفتار

آسام(ڈیلی اردو/بی بی سی) انڈیا کی ریاست آسام کے شہر تیزپور میں انڈین فضائیہ کے ایک ریٹائرڈ افسر کلندرا شرما کو پاکستانی انٹیلیجنس ایجنٹس کے ساتھ مبینہ رابطے اور ملک کے دفاع سے متعلق دستاویزات شیئر کرنے کے الزام میں گرفتار کر لیا گیا ہے۔

ضلع سونتپور کے سینئر سپرنٹنڈنٹ آف پولیس (ایس ایس پی) بارُن پرکیستھا نے تصدیق کی کہ کلندرا شرما جمعے کو گرفتار ہوا اور گذشتہ دو ہفتوں سے پولیس کی نگرانی میں تھا۔ ان کے قبضے سے متعدد دستاویزات اور کچھ سوشل میڈیا اکاؤنٹس ضبط کیے گئے۔

پولیس کے مطابق ملزم کے خلاف پانچ روزہ ریمانڈ حاصل کر لیا گیا ہے اور اس پر انڈیا کی سالمیت اور خودمختاری کو خطرے میں ڈالنے، انڈین حکومت کے خلاف بغاوت کرنے، مجرمانہ سازش اور شواہد مٹانے کے الزامات ہیں۔

ابتدائی تحقیقات کے مطابق ملزم نے قومی سلامتی سے متعلق اہم معلومات نامعلوم افراد کے ساتھ شیئر کیں۔ کلندرا شرما سنہ 2002 میں ایئر فورس سے ریٹائر ہوا اور گذشتہ تین برسوں سے تیزپور یونیورسٹی میں ٹیکنیکل اسسٹنٹ کے طور پر کام کر رہا تھا۔