اٹلی نے اسرائیل کے ساتھ دفاعی تعاون کا معاہدہ معطل کر دیا

روم (ڈیلی اردو) یورپی یونین کے رکن ملک اٹلی نے اسرائیل کے ساتھ دفاعی شعبے میں تعاون کے اپنے معاہدے کو معطل کر دیا ہے۔ یہ بات اطالوی خاتون وزیر اعظم جارجیا میلونی نے منگل 14 اپریل کے روز کہی۔

ملکی دارالحکومت روم سے موصولہ رپورٹوں کے مطابق جارجیا میلونی نے کہا کہ اسرائیل کے ساتھ دفاعی تعاون کا وہ معاہدہ، جس کی خود بجود تجدید ہو جانا تھی، اب معطل کر دیا گیا ہے۔

صنعتی طور پر ترقی یافتہ ملکوں کے گروپ جی سیون کے رکن اٹلی کی سربراہ حکومت جارجیا میلونی نے کہا کہ ان کی حکومت نے یہ فیصلہ مشرق وسطیٰ میں پائے جانے والے موجودہ تنازعات کی وجہ سے کیا ہے۔

اٹلی یورپ میں اسرائیل کے قریبی اتحادیوں میں سے ایک

وزیر اعظم جارجیا میلونی دائیں بازو کی طرف جھکاؤ رکھنے والی حکومت کی سربراہ ہیں اور اٹلی کو روایتی طور پر یورپ میں اسرائیل کے قریب ترین اتحادیوں میں سے ایک سمجھا جاتا رہا ہے۔

تاہم حالیہ ہفتوں کے دوران روم حکومت کی طرف سے اسرائیل پر اس کی فوج اور فضائیہ کے ہمسایہ ملک لبنان پر مسلسل اور ہلاکت خیز حملوں کی وجہ سے شدید تنقید بھی کی جاتی رہی ہے۔

لبنان پر ان اسرائیلی حملوں کے مجموعی طور پر لاکھوں متاثرین میں وہاں اقوام متحدہ کے مینیڈیٹ کے تحت فرائض انجام دینے والے اطالوی فوجی دستے بھی شامل تھے۔

ملکی نیوز ایجنسیوں کے مطابق جارجیا میلونی نے شمالی اٹلی کے شہر ویرونا میں صحافیوں سے گفتگو کرتے ہوئے کہا، ’’موجودہ صورت حال کی روشنی میں حکومت نے فیصلہ کیا ہے کہ اسرائیل کے ساتھ دفاعی معاہدے کی خود بخود تجدید معطل کر دی جائے۔‘‘

معاہدے کی معطلی کے نتائج

اطالوی وزارت دفاع کے ایک ذریعے نے نیوز ایجنسی روئٹرز کو بتایا کہ اس دوطرفہ معاہدے کی معطلی کا ایک نتیجہ یہ بھی ہو گا کہ اب اٹلی اسرائیل کے ساتھ فوجی تربیتی شعبے میں کوئی تعاون نہیں کرے گا۔

وزارت دفاع کے اس ذریعے نے، جسے میڈیا سے بات کرنے کا اختیار نہیں تھا، روئٹرز کو بتایا کہ جارجیا میلونی نے اسرائیل کے ساتھ اس معاہدے کو معطل کرنے کا فیصلہ  پیر 13 اپریل کو کیا اور یہ فیصلہ وزیر خارجہ انٹونیو تاجانی، وزیر دفاع گیڈو کروسیٹو اور نائب وزیر اعظم ماتیو سالوینی  کے ساتھ مشاورت سے کیا گیا۔

روئٹرز کے مطابق اٹلی کی حکومت کے اس فیصلے پر اسرائیلی موقف جاننے کے لیے جب اسرائیل میں وزارت خارجہ سے تحریری درخواست کی گئی، تو اس کا کوئی فوری جواب نہ دیا گیا۔